भक्तपुर, १५ फागुनबिप्लव नेतृत्वको नेकपा माथि गृहमन्त्री रामबहादुर थापा बादल नरम देखिएका छन । उनी गृहमन्त्री भएको भोलीपल्टै नेकपाका पक्राउ परेका नेता रिहा भएका छन् ।
नेपाल कम्युनिस्ट पार्टीका स्थायी समिति सदस्य हेमन्त प्रकाश ओली ‘सुदर्शन’ रिहा भएका हुन् । उनलाई नेकपाको युवा संगठन राष्ट्रिय युवा जनस्वयमसेवकको राष्ट्रिय सम्मेलनमा भाग लिन जाँदा विराटनगरबाट गिरफ्तार गरिएको थियो ।
सुदर्शनलाई फागुन ६ गते प्रहरीले विराटनगरबाट गिरफ्तार गरेको थियो । उनीसहित पूर्व राज्यमन्त्री समेत रहेका पार्टीका पोलिटब्युरो सदस्य पदम राई लगायत पनि पक्राउ परेका थिए । प्रहरीले कार्यक्रममा हस्तक्षेप गर्दै धरपकड गरेको थियो ।
नेकपाले फागुन ८ गते गिरफ्तारीको बिरुद्धमा नेपाल बन्द गर्यो भने त्यो यता पनि बिरोधको कार्यक्रम गर्दै आएको भएपनि सुनुवाई भएको थिएन ।
नेता राम बहादुर थापा बादल गृह मन्त्रीमा नियुक्त भएको भोलीपल्टै नेता सुदर्शन रिहा भएपछी यसलाई बादलको नेकपाप्रतिको नरम नीतिको रुपमा हेरिएको छ ।
प्रहरीले नेता सुदर्शनलाई आज साझँ रिहा गरेको हो । उनी संगै समातिएका नेता पदम राई लगायतका नेतालाई भने हिरासतमै राखिएको छ ।