भर्खरै प्राप्त सूचना अनुसार छ लेन सडकको चुनदेवीमा सडक दुर्घटना हुँदा एक १९ बर्षका युवाको ज्यान गएको छ । दुई मोटरसाइकल एक आपसमा ठोक्किदा दुर्घटना भएको हो ।

दुर्घटनाबाट मृत्यु भएका युवा भक्तपुर नगरपालिका -५ का प्रमोद श्रेष्ठ भएको प्रहरीले भनेको छ । अन्दाजी बेलुकी ५:४५ बजेको समयमा दुर्घटना भएको हो । सल्लाघारीबाट सूर्यबिनायकतर्फ जादै गरेका बा ९२ प ४६४ र बा ६१ प ४१५ नम्बरका मोटरसाइकल एक आपसमा ठोक्किदा दुर्घटना भएको ट्राफिक प्रहरीको दावी छ ।

यता महानगरीय प्रहरी बृत्त जगातीमा इभक्तपुरले सम्पर्क गर्दा घटनाको बिस्तृत विवरण प्राप्त नभएको बताइएको छ । मृत्यु पुष्टि भएपनि कसरी दुर्घटना भयो भन्ने अनुसन्धान भैरहेको जगाती प्रहरीले जानकारी गराएको छ ।

घटनास्थलमा दुई मोटरसाइकल भेटिएकोले ठोक्किएर दुर्घटना भएको आशंका गरिएको भएपनि मोटरसाइकलमा सवार अन्य ब्यक्तिहरु सम्पर्कमा नभएकोले खोजी भैरहेको र त्यस पछि मात्र यकिन भन्न सकिने जगाती बृत्तका एक प्रहरी अधिकारीले इभक्तपुरलाई जानकारी गराए ।

अपडेट : दुर्घटनापछि फरार बा ६१ प ४१५ नम्बरका मोटरसाइकल चालक काभ्रे नमोबुद्धका कुल बहादुर खनाल फेला परेको र उनलाई नियन्त्रणमा लिएर आवश्यक अनुसन्धान अघि बढेको महानगरीय प्रहरी परिसर भक्तपुरका प्रवक्ता कृष्ण प्रसाइले जानकारी गराएका छन ।