मध्यपुरथिमी नगरपालिकाका मेयर मदनसुन्दर श्रेष्ठको आक्रमणकारीलाई नपक्रिएको भन्दै  नेकपा एमालेका नेताकार्यकर्ता आन्दोलित भएका छन् । आज उनीहरुले आक्रमणकारीलाई पक्राउ गर्न माग गर्दै जिल्ला प्रशाशन कार्यालय भक्तपुरमा धर्ना दिएका छन् ।

एमालेको भातृ संगठन युवा संघ नेपाल, महिला संघ र अनेरास्ववियुले जिप्रकामा धर्ना दिएका हुन् । उनीहरुलाई चाँगु नारायणका मेयर उपमेयर लगायतले पनि साथ् दिएका थिए ।

‘आक्रमणकारीलाई पक्राउ गर, कडा सुरक्षा व्यवस्था गर’ जस्ता नारासहितका प्ले कार्ड बोकेर नाराबाजी गर्दै जिल्ला प्रशासन कार्यालय पुगेका उनीहरुले केहिसमय कार्यालय अगाडि धर्ना दिए ।

धर्नापछि युवा संघ नेपालका केन्द्रीय अध्यक्ष रमेश पौडेलले प्रमुख जिल्ला अधिकारी द्रोण पोखरेललाइ आफुहरु हातमा दहि जमाएर नबस्ने धम्कि समेत दिए । ११ दिनसम्म मेयरका आक्रमणकारी फेला नपर्नुले आक्रमणकारीको मनोबल बढ्न पुगेको बताउदै पाैडेलले एमालेका जनप्रतिनिधिमाथि शृंखलाबद्ध रुपमा आक्रमण भइरहेको कुरा सह्य नहुने बताए ।

“आक्रमणको क्रम बढ्दै जान्छ भने युवा संघ हातमा दही जमाएर बस्दैन, त्यस्ता आक्रमणकारीसँग चोकचोकमा प्रतिवाद गर्न युवा संघ तयार छ ।” उनले भने ।

जवाफमा प्रजिअ पोखरेलले आक्रमणकारीको पहिचान भइसकेको भए पनि उनीहरु लुकेर बसेका कारण पक्राउ गर्न नसकेको उल्लेख गर्दै अब छिट्टै पक्राउ गरिने दाबी गरे । प्रजिअ पोखरेलले छिट्टै आक्रमणकारी नसमातेपनि रवाना पत्र भने समात्दैछन् । उनको सर्लाहीमा सरुवा भैसकेको छ ।

११ दिनअघि मेयर श्रेष्ठ आफ्नै निवासको नजिकै आक्रमणमा परेका थिए । उनीमाथिको आक्रमणको बिषयलाई लिएर अनेक शंका र धारणा मानिसहरुमा रहेको छ । आक्रमणकारी पत्ता नलाग्दासम्म यो बिषय रहस्यकै गर्भमा लुकेको छ ।