भक्तपुर, २३ बैशाखमध्यपुर थिमि लायकूस्थित आदर्श माध्यमिक विद्यालयमा निःशुल्क स्वास्थ्य शिविर संचालन गरिएको छ ।
जनसमुदायमा महिलाहरुको मुख क्यान्सर, मुटु रोग, सुगर रोग, खकार परीक्षण र सामान्य रोगहरुको परीक्षण गर्ने उद्देश्यले निःशुल्क स्वास्थ्य शिविर संचालन गरिएको प्रिज्म साकोसका अध्यक्ष प्रेमकाजी श्रेष्ठले जानकारी दिए ।
स्वास्थ्य शिविरमा महिलाहरुको मुख क्यान्सरमा ५५ जना, मुटुरोगमा १०५ जना, मधुमेहमा १०४ जना, खकार परीक्षणमा ५२ जना र सामान्य रोग परीक्षणमा ४४ जना महिला पुरुष गरी ३६० जनाले स्वास्थ्य परीक्षण गरेका थिए ।
स्वास्थ्य शिविर प्रिज्म बचत तथा ऋण सहकारी संस्थाको ६ औं स्थापना दिवसको अवसरमा प्रिज्म बचत तथा ऋण सहकारी संस्था, नेपाल क्षयरोग निवारण संस्था, बासुदेव प्रसाद जोशी स्मृति प्रतिष्ठान र नेपाल परिवारनियोजन संघ काठमाडौं उपत्यका शाखाको संयुक्त आयोजनामा भएको क्षयरोग संस्थाका निवर्तमान सभापति बाबुकाजी श्रेष्ठले संचारकर्मीहरुलाई जानकारी दिए ।
उक्त स्वास्थ्य शिविरमा निःशुल्क औषधी वितरण गरिएको छ भने निःशुल्क ई.सी.जी. समेत उपलब्ध गरिएको साकोसका प्रबन्धक राजु बज्राचार्यले बताए ।