भक्तपुर, ८ जेठनेपाल मजदूर किसान पार्टीका अध्यक्ष नारायणमान विजुक्छेले शहर अव्यस्थित हुनुमा अव्यवस्थित बसाइँसराइ प्रमुख कारक रहेको बताउदै सो रोक्न सुझाव दिएका छन । एक जिल्लाबाट अर्को जिल्लामा हुने बसाइँ सराइ नरोक्दासम्म समस्या यथावत रहने उनको तर्क छ ।
स्थानीय तहका जनप्रतिनिधिहरु निर्वाचित भएको एक वर्ष पूरा भएको अवसरमा सोमबार भक्तपुर नगरपालिकाले आयोजना गरेको बिशेष कार्यक्रममा बोल्दै नेमकिपा अध्यक्ष बिजुक्छेले उक्त कुरा बताएका हुन् ।
“ बसाइँसराइको कारण फोहर र प्रदूषण मात्र होइन अपराधसमेत बढिरहेको छ ।” उनले भने ।
शहरमा डेरावालको यकिन तथ्यांक नै नभएको भन्दै उनले प्रहरी प्रशाशनले त्यसको रेकर्ड राख्नुपर्ने भनेका छन् ।
शहरमा आउनेजाने क्रम चल्दा त्यसले बिकाशको प्रक्षेपणमा प्रभाव पार्ने उनको जिकिर छ । केहि देशमा एउटा जिल्लाबाट अन्य जिल्लामा बसाइँसराइ गर्न नपाइने नीति भए जस्तै नेपालमा पनि त्यस्तो अभ्यास गर्नुपर्नेमा उनले जोड दिए ।
उक्त अवसरमा भक्तपुर नगरपालिकाका मेयर सुनिल प्रजापतिले एक बर्षमा नगरपालिकाले गरेका कामको जानकारी गराउदै ५ बर्षमा समृद्ध शहरको सपना साकार हुने दावी गरे ।