भक्तपुर, ९ जेठअरनिको राजमार्ग अन्तर्गत सुर्यविनायकनगरपालिका -९ पलासेमा स्कुटरलाई टिपरले ठक्कर दिँदा तीन जनाको मृत्यु भएको छ । मध्यान्ह १२:३० बजे साँगाबाट काठमाण्डौ तर्फ जाँदै गरेको बा. ५६ प. १२२७ नं. को स्कुटीलाई सोही दिशाबाट आइरहेको बा. ३ ख. ६६७४ नं. को टिपरले ठक्कर दिदा स्कुटीमा सवार ३ जनाको मृत्यु भएको हो ।
मृत्यु हुनेमा स्कुटी चालक भक्तपुर जिल्ला मध्यपुर ठिमी न.पा. १ लोकन्थली बस्ने बर्ष ५० को हरि बहादुर कटुवाल , स्कुटी पछाडी सवार जिल्ला दोलखा मेलुङ्ग ६ घर भई हाल भक्तपुर लोकन्थलीमा बस्ने बर्ष ३६ की सविता घिमिरे र मृतक सविता घिमिरेको छोरा नेपाल प्रहरी आवसिय उच्च माध्यमिक विद्यालय साँगा काभ्रेमा पढ्ने बर्ष १३ को अरविन घिमिरे भएको महानगरीय प्रहरी परिसरका प्रहरी निरीक्षक सुशील कुमार पाण्डेले जनाए ।
घाइते भई उपचारको लागी भक्तपुर अस्पताल लगिएका तिनै जनाको मृत्यु भएको भन्ने सम्बन्धित चिकित्सकले घोषणा गरेपछि शव आवश्यक कारवाहीको.अस्पतालमानै राखिएको बताइएको छ ।
दुर्घटना गराउने टिपरका चालक भने फरार भएका छन् । उनको खोजी भैरहेको र दुवै सवारी साधन महानगरीय प्रहरी वृत्त जगातीको नियन्त्रणमा रहेको प्रहरी निरीक्षक पाण्डेले जानकारी गराए ।
अपडेट : महानगरीय प्रहरी परिसर भक्तपुरका प्रहरी नायब उपरीक्षक एवं सूचना अधिकारी कृष्ण प्रसाईंका अनुसार धादिङ थाक्रे घर भई हाल थानकोटमा बस्ने ३० वर्षीय सञ्जीव सुचिकारलाई गएराति नियन्त्रणमा लिइएको छ । पक्राउ परेका चालक सुचिकारलाई प्रहरी हिरासतमा राखी थप अनुसन्धान अघि बढाइएको प्रसार्इंले बताए ।