काठमाडौँ, १२ जेठकृषिमा राज्यले दिने अनुदान दलालहरुको हातमा मात्रै पर्ने भएकोले असली किसानहरु निरास भएकोप्रति दुख व्यक्त गर्दै कृषि ,भुमि व्यवस्था तथा सहकारी राज्य मन्त्री रामकुमारी चौधरीले अव दलालहरुको सिन्डिकेटलाई ध्वस्त पार्ने योजना बनाइएको दावी गरेकी छ्न् ।
राजधानीमा शुक्रवार महिला पाराभेटरीनरीयनहरुको राष्ट्रिय भेलालाई उदघाटन गर्दै राज्य मन्त्री चौधरीले उक्त दावी गरेकी हुन् । ”कृषिमा रहेको दलालहरुको सिन्डिकेट तोडेर अनुदानलाई असली कृषकमा पुर्याउने योजना बनिसकेको छ, केहि समयमै परिणाम देखिनेछ ।” उनले दावी गरिन् ।
देशभरीबाट सहभागी भएका महिला पाराभेटरीनरीयनहरुलाई संबोधन गर्दै राज्य मन्त्री चौधरीले स्थानीय तहको वडा सम्म भेटरीनरी सेवा पुर्याउने लक्ष्य रहेको समेत बताइन् ।
पशु स्वास्थ्यको सम्बन्ध मानव स्वास्थ्यसंग जोडिएकोले सरकार यो विषयमा गम्भीर रहेको बताउदै राज्य मन्त्री चौधरीले पशु स्वास्थको बारेमा सबैले चासो र चिन्ता लिनुपर्ने जिकिर गरिन् । ”पशु स्वास्थ्यप्रति सरकार गम्भीर छ, रोगबाट पशुधनको रक्षा गर्न सवै एकसाथ लाग्नुपर्छ ।” उनले भनिन् ।
एक फरक प्रसंगमा बोल्दै उनले संविधानमा महिलालाइ ३३% आरक्षण भनिएता पनि राजनितिक दलहरु र आफनै दलले समेत केन्द्रिय समितिमा ३३% नपुर्याएको प्रति चिन्ता व्यक्त गर्दै सबै महिलाहरु आफ्नो अधिकार प्रति सचेत भएर अघि बढ्नुपर्नेमा जोड दिएकी थिइन् ।