भक्तपुर, २२ जेठकेहि महिनादेखि रोकिएको शिक्षक सरुवा खुलेको छ । शिक्षा विभागले मंगलवार एक निर्णय गर्दै रोकिएको सरुवा सुचारु गरेको हो ।
बिभाग श्रोतका अनुसार शिक्षक सरुवामा मनपरी भएको भन्दै उजुरी परेपछि विभागले सरुवा स्थगित गरेको थियो । सिरहा , सप्तरी , सर्लाही , दाङ्ग लगायतका जिल्लामा मनपरी ढंगमा शिक्षक सरुवा भएको गुनासो आएपछि सरुवा स्थगित गर्नुपरेको श्रोतको दावी छ ।
शिक्षक सरुवाको अधिकार जिल्लाका शिक्षा विकास तथा समन्वय इकाईलाइ रहेको छ । जिल्लाका शिक्षा विकास तथा समन्वय इकाई प्रमुखहरुको परिवर्तन भए संगै शिक्षक सरुवा गर्ने निर्णय गरिएको छ । शिक्षक सरुवाको सम्बन्धमा देखिएका समस्याहरु हल भएपछि सरुवा फुकुवा गरिएको बताइएको छ ।
रोकिएको शिक्षक सरुवाको सम्पूर्ण प्रक्रिया सुचारु भएको शिक्षा विभागका महानिर्देशक बाबुराम पौडेलले पुष्टि गरेका छन । शिक्षक सरुवा नियमित प्रक्रिया भएकोले रोकिराख्ने कुरा जायज नभएको ठहर गर्दै फुकुवा गर्ने निर्णय गरिएको उनको भनाइ छ ।
सरुवाको नियमित प्रक्रिया अबरुद्ध हुदा शिक्षकहरु मर्कामा परेका थिए । यसले शिक्षकको दरबन्दी मिलान गर्ने काम समेत अघि बढ्न सकेको थिएन ।