मध्यपुरठिमी नगरपालिका -९ निलबराही बोडेमा एक स्कूल बस पल्टदा ५९ घाइते भएका छन् । क्रिश्चियन कम्युनिटी स्कूल मुलपानी काठमाण्डौको बा. १ क. ९२५० नं. को स्कूल बस पल्टदा बसमा सवार ५९ जना घाइते भएका हुन् ।

बिद्यालयबाट बिद्यार्थी घर पुर्याउन हिडेको बस बेलुकी अन्दाजी पौने पाँच बजेतिर सडकको किनारामा भासिदा सडकबाट करीव ३ मिटर तल पल्टिएको थियो । बस पल्टदा बसमा सवार ५८ जना विद्यार्थी र १ सहचालक सहित ५९ जना घाईते भएका छन् भने बसका चालक भने फरार रहेको जानकारी प्राप्त भएको छ ।

घाइतेहरुहरुको नागरीक सामुदायिक अस्पताल गठ्ठाघर र मध्यपुर ठिमी अस्पतालमा उपचार भैरहेको बताइएको छ । सहचालक अनिल थापासहित ३ को अवस्था गम्भीर रहेको र एक चार बर्षिय छात्रा प्रतिज्ञा श्रेष्ठलाई थप उपचारको लागि केएमसी अस्पताल पुर्याइएको महानगरीय प्रहरी परिसरका प्रवक्ता रेवती रमण पोखरेलले पुष्टि गरेका छन् ।

घटना लगत्तै स्थानिय र प्रहरी उद्धारमा जुटेकाे र पल्टिएको बसलाई क्रेनको सहायताले निकालिएको महानगरीय प्रहरी वृत्त थिमीका प्रहरी नायब उपरीक्षक मनोज केसीले बताए ।