भक्तपुर, १९ साउननेपालकै पहिलो भिक्षुणी विहार रहेको भक्तपुरमा बौद्ध चैत्य स्थापना गरिएको छ । भक्तपुर- ९ वाचुहिटीस्थित विहार परिसरमा बौद्ध चैत्य स्थापना गरिएको हो ।
विहार परिसरस्थित वाचुहिटी ढुंगेधारामा फेला परेको शिलालेख अनुसार राजा मानदेवको पालामा उक्त विहारमा भिक्षुणी संघ रहेको उल्लेख गरिएको र त्यसबारे उजागर गर्न चैत्य स्थापना गरिएको जीतलाल मानन्धरले जानकारी दिए ।
शुक्रवार विशेष पूजा गरेर चैत्यको उद्घाटन गरिएको थियो । बौद्ध धर्मावलम्वी र स्थानीयको उत्साहजनक सहभागितामा उत्घाटन सम्पन्न भएको स्थानीय रामकृष्ण मानन्धरले बताए ।
छानिएर राखिएको माटो तथा ढुंगाबाट बनाइएका पुज्य स्मारक नै चेतिय अर्थात चैत्य हुन् । चैत्यका ४ प्रकार मध्य यो लखं चैत्य अर्थात धर्म चैत्य भएको बताइएको छ ।
उक्त चैत्यको गर्भगृहमा सवा लाख अरु चैत्य भएको र प्रत्येकलाइ शुद्ध कालो माटोमा मन्त्र फुकेर त्यसलाई तिलको तेलमा डुबाएर पाँच बौद्ध मन्त्र फुकेको अक्षता चढाएर निर्माण गरिएको जानकारी प्राप्त भएको छ । मिहिनेतका साथ् बनाइएको यो चैत्यका कालिगढ़ राजु लामाले पारिश्रमिक वापत ४ लाख ५० हजार आफूले लिएको बताए ।
उक्त चैत्य निर्माणले उक्त स्थान वरपर सरसफाई समेत भएको र यसले एेतिहासिक, धार्मिक, सास्कृतिक महत्व बोक्नुका साथै वातावरणमा समेत राम्रो प्रभाव पारेको भन्दै स्थानीय राजेश मानन्धरले सन्तोष व्यक्त गरे ।
निरन्तर खबरको लागि फेसबुक पेज लाइक गर्नुहोस ।
