भक्तपुर, ७ भदाैएभरेष्ट इंगलिश स्कूल भक्तपुरको आयोजनामा भएको सातौं एभरेष्ट इन्टर स्कूल स्पेलिङ कन्टेस्टमा मनकामना इंगलिश स्कूल कमलविनायक भक्तपुर प्रथम भएको छ । प्रतियोगितामा जेम्स स्कुल धापाखेल ललितपुर द्धितीय र विद्या संस्कार हायर सेकेण्डरी स्कूल नयाँं वानेश्वर काठमाडौं तृतीय भए ।
बिहीबार भएको फाइनल प्रतियोगिताका विजयीहरुलाई विहीबार नै ट्रफी, मेडल र प्रमाणपत्र वितरण गरियो । शिक्षा विकास तथा समन्वय इकाई भक्तपुरका प्रमुख हरिप्रसाद दाहालले विजयी स्कूल तथा विद्यार्थीलाई पुरस्कार तथा प्रमाणपत्र वितरण गरे ।
उक्त कार्यक्रमका प्रमुख अतिथि दाहालले प्रतियोगिताले विद्यार्थीहरुमा अन्तरनिहित प्रतिभा प्रस्फुटनमा सहयोग मिल्ने बताउदै बिजेतालाई बधाई र आयोजकलाई धन्यवाद दिएका थिए ।
कार्यक्रममा भक्तपुर नगरपालिका वडा नं ५ का वडाअध्यक्ष प्रेमगोपाल कर्माचार्य, श्रोतव्यक्ति कृष्णप्रसाद कर्माचार्य, विद्यालय व्यवस्थापन समितिका अध्यक्ष रामगोपाल कर्माचार्य, विद्यालयका संस्थापक प्रिन्सिपल भक्त राजभण्डारी, प्रिन्सिपल कमलादेवी अमात्य राजभण्डारीलगायतले उत्कृष्ट विद्यार्थीलाई बधाई दिएका थिए । प्रतियोगितामा काठमाडौं, ललितपुर र भक्तपुरका विभिन्न सामुदायिक, निजी तथा आवासीय गरी ११ स्कूलका विद्यार्थीहरुले प्रतिस्पर्धा गरेका थिए ।