महिला सुत्केरी हुँदा त प्रोत्साहन भत्ता पाएको सबैलाई थाहाँ नै होला तर सर्लाहीको हरिवन नगरपालिकामा भने अब महिलाको लागी मात्रै नभइ पशु सुत्केरी भएमा पनि प्रोत्साहन भत्ता पाउने ब्यवस्था मिलाइएको छ ।

पशुपालनमा प्रोत्साहन स्वरुप भत्ता दिने निर्णय भएको नगरपालिकाको जिकिर छ । हरिवन नगरपालिकाको वडा नम्बर ९ को मंगलबार बिहान बसेको बैठकले यस्तो निर्णय गरेको हो ।

वडा अध्यक्ष सिताराम पोख्रेलको अध्यक्षतामा बसेको बैठकले यहि भाद्र १६ गते देखि नै लागु हुने गरि वडा कार्यालयबाट बिमा गरेका पशु सुत्केरी भएमा पशु धनीलाई वडा कार्यालयले रकम उपलब्ध गराउने जानकारी प्राप्त भएको छ । पशु पोषणमा यसले राम्रो प्रभाव पार्ने र दुधको उत्पादन बढ्ने वडाध्यक्ष पोख्रेलले बिश्वास ब्यक्त गरेका छन् ।  पशु चिकित्सक भिम रपालको सिफारिसमा प्रति पशु एक हजार रुपैयाँका दरले रकम उपलब्ध गराउने निर्णय गरिएको बैठकमा सहभागी विद्यार्थी नेता रोशन दाहलले जानकारी दिए ।

त्यस्तै बैठकले वडा भित्र झै-झगडा, बादबिबाद, किचलो र मुद्दामामिला मिलाउनको लागि माधब दाहाल , दुर्गा बहादुर कार्की ,शंकर बहादुर थापा ,डाकुरनाथ खतिवडा र सीता थापा रहेको पाँच सदस्यीय न्यायिक समिति समेत बनाएको बताइएको छ । त्यसैगरी सिलाई कटाई र ब्युटिसियन तालिम संचालन गर्नका लागि पुरानै प्रशिक्षकलाई निरन्तरता दिने र एेतिहासिक पोखरी शिव सागरको सर सफाईको लागि लालबन्दी- २ पाँचकुमारीमा रहेको नेपाली सेनाको रणशेर गणलाई आग्रह गर्ने समेत निर्णय भएको हरिवन -९ काे वडा कार्यालयले जनाएको छ ।