सूर्यविनायक-५ सृजनानगरमा एकसाथ् ३ पसलमा चोरी भएको छ । माहाकाली पेट्रोल पम्प पछाडि तज टोल जाने बाटोमा गएराती एकसाथ् ३ पसलमा चोरी भएको हो ।

चोकमै रहेको लक्ष्मी खाद्यान्न स्टोर त्यसैगरी अनिल इन्टरप्राइजेज र एक शु सेन्टरमा सटर बंग्याएर पसेका चोरहरुले नगद मात्र चोरेर लगेका छन् । सबैभन्दा बढी लक्ष्मी खाद्यान्न स्टोरबाट चोरी भएको छ । पसलमा भएको १ लाख ५५ हजार चोरिएको संचालकले बताए ।

चोरहरुले जगको प्रयोग गरि रडको सहायताले सटर बंग्याएर पसलमा पसी चोरी गरेको स्थानीयले जानकारी गराएका छन् । बिहानीपख अन्दाजी ३ बजेको समयमा संगठितरुपमा आएका चोरहरुको समुहले छानीछानी ३ पसलमा चोरी गरि फरार भएपछि सुरक्षाको बिषयलाई लिएर स्थानीय चिन्तित बनेका छन् ।

सटरको आवाज आएपछि आफूले हल्ला गरेको र चोरहरु हेर्दाहेर्दै हाई- वे तर्फ भागेको लक्ष्मी खाद्यान्न स्टोरका संचालकले बताए । आफूले ३ चोर भाग्दै गरेको देखेको र तत्कालै प्रहीलाई खवर गरेको उनले जानकारी गराए ।

घटना लगत्तै १० मिनेटमा प्रहरी उपस्थित भएको भएतापनि चोरहरु पक्राउ परेका छैनन् ।

मालसामान र रिचार्ज कार्ड नचलाएका चोरहरु यस अघि पनि चोरीमा संलग्न भएका पेशेवर चोरहरु हुनसक्ने प्रहरीले बताएको छ । चोरहरुको खोजी कार्य भैरहेको र उनीहरु उम्कन नसक्ने प्रहरीको दावी छ ।