ठिमीस्थित महानगरीय प्रहरी वृत्तले मोबाइल चोरीमा संलग्न एक समुहलाई पक्राउ गरिएको बताएको छ । जिल्लाको बिभिन्न स्थानबाट उनीहरु पक्राउ परेका हुन् ।

पक्राउ पर्नेमा सिन्धुपाल्चोकको सुनकोशी गाँउपालिका घर भई हाल कोटेश्वर बस्ने २२ बर्षिय वितेश भण्डारी, सिन्धुपाल्चोककै जलबिरे घर भई हाल भक्तपुर सानोठिमी बस्ने १८ बर्षिय राजु तामाङ, नुवाकोटको त्रिशुली घर भई हाल ठिमी बस्ने बर्ष २२ को मनिष बस्नेत र भारत घर भई हाल सल्लाघारी बस्ने बर्ष १८ को अमोद चौधरी रहेको महानगरीय प्रहरी परिसर भक्तपुरका प्रवक्ता प्रहरी नायव उपरीक्षक रेवतीरमण पोखरेलले पुष्टि गरे ।

मध्यपुर ठिमी- ४ कमेरोटार डेरा कोठा गरी बस्ने दोलखाका प्रविण कार्कीको सिम सहितको पानासोनिक मोबाइल सानोठिमीबाट चोरी भएको भन्ने उजुरीको आधारमा अनुसन्धान गर्दै जाँदा महानगरीय प्रहरी वृत्त ठिमी भक्तपुरको प्रहरी टोलीले उनीहरुलाई चोरी गरेको उक्त मोवाइल र अन्य ४ थान मोवाईल सहित समातेको बताइएको छ ।

प्रमाणसहित समातिइएका चारै जनालाई चोरी मुद्दा शिर्षकमा  बिहीबार भक्तपुर जिल्ला अदालतमा पेश गरी थप अनुसन्धान कार्य भईरहेको ठिमीस्थित महानगरीय प्रहरी वृत्तले बतायो ।