भक्तपुर, ६ मंसिरभक्तपुर नगरपालिकाकी उपमेयर रजनी जोशीको घरमा दिनदहाडै चोरी भएको छ । जोशी भक्तपुर नगरपालिकाकी उपमेयर भए पनि उनको सूर्यविनायक- ८ मा रहेको घरमा चोरी भएको हो ।
भूकम्पले भक्तपुर नगरपालिका स्थित घरमा असर गरेपछि सूर्यविनायक- ८ स्थित नयाँ घरमा जोशी परिवार सरेको जानकारी प्राप्त भएको छ । अझै निर्माण सम्पन्न नभैसकेको उक्त घरमा मंगलवार दिनदहाडै चोरी भएको हो ।
मंगलबार दिउसै घरको मूल ढोका फोडेर भित्र पसेका चोरले नगद र गरगहना चोरेर बेपत्ता भएको बताइएको छ । उपमेयर जोशीले करीव १५ लाख बराबरको धनमाल चोरी भएको रिपोर्ट गरेकी छन ।
जनप्रतिनिधिकै घर असुरक्षित भएको भन्दै स्थानीयहरुले टोलको सुरक्षा अवस्थालाई लिएर चिन्ता व्यक्त गरेका छन । प्रहरीले बढ्दो चोरी नियन्त्रण गर्न नसकेको मानिसहरुको आरोप छ ।
उत्पत्यका नगरपालिका फोरमले बिज्ञप्ती नै निकालेर उपत्यका भित्रको सुरक्षा व्यवस्था तथा आम नागरिकको सुरक्षामाथि समेत प्रश्न चिन्ह खडा भएको भनेको छ ।
महानगरीय प्रहरी परिसर भक्तपुरले भने चोरीमा संलग्नहरुको खोजी भैरहेको बताएको छ । ‘’घर एकान्तमा भएकोले थाँहा हुन् सकेन , दिउसोको घटना प्रहरीलाई साँझ साढे ६ बजेतिर मात्रै खबर भयो । अहिले भक्तपुर प्रहरी र अपराध अनुसन्धान महाशाखा , टेकुबाट आएको विशेष टोलीले घटनाको अनुसन्धान गरिरहेको छ, चोरीमा संलग्नहरु उम्कन सक्नेछैनन ।” महानगरीय प्रहरी परिसर भक्तपुरका प्रवक्ता एवं डीएसपी रेवतीरमण पोखरेलले नेपालवाल संग भने । जिल्लामा चोरीका घटना भएतापनि चोरहरु समात्न प्रहरी सफल भएको जिकिर गर्दै पोखरेलले चोरी नियन्त्रणमा प्रहरी प्रतिबद्ध रहेको दावी गरे ।