भक्तपुर, ३ साउन सूर्यविनायकमा ठूलो खाल जमाएर तास खेल्नेहरुलाई प्रहरीले पक्राउ गरेको छ । लाखौको खालमा तास खेल्ने पेशेवर जुवाडेहरू प्रहरीको फन्दामा परेका हुन् । तास खेलिरहेको अवस्थामा प्रहरीले १० जनालाई नियन्त्रणमा लिएको छ ।
विशेष सूचनाको आधारमा सूर्यविनायक नगरपालिका- ६ सूर्यविनायक स्थित हरिबहादुर खड्काको घर छापा मार्दा प्रहरीले शुक्रवार ठूलो संख्यामा पेशेवर जुवाडे पक्रन सकेको महानगरीय प्रहरी परिसर भक्तपुरका प्रवक्ता रेवतीरमण पोखरेलले जानकारी गराए ।
प्रवक्ता पोखरेलका अनुसार महानगरीय प्रहरी परिसर भक्तपुरबाट खटिएको प्रहरी टोलीले तास खेलिरहेको अवस्थामा १० जनालाई पक्राउ गर्न सफल भएको छ भने उक्त तासको खालबाट रु एक लाख तेत्तीस हजार तीन सय पचास रुपैया नगद र चौतिस लाख तीस हजार रकम बराबरको ६ थान बिभिन्न बैंकहरुको चेक बरामद गरिएको छ ।
पक्राउ परेकाहरुलाई यतिबेला महानगरीय प्रहरी परिसर भक्तपुरमा ल्याई थप अनुसन्धान भैरहेको प्रहरीको भनाइ छ । प्रहरीले समातिएका व्यक्तिहरुको नाम भने सार्वजनिक गरेको छैन ।
यस अघि हिजो विहीवार मात्र भक्तपुर नगरपालिका- १ सल्लाघारीमा तास खेलिरहेको अवस्थामा ६ जना प्रहरीको फन्दामा परेका थिए ।
प्रहरी टोलीले तास खेलिरहेको अवस्थामा नगद रु ६७ हजार ८५ रुपैया र ७ बुक तास सहित ६ जनालाई विहीवार पक्राउ गरेको थियो ।
नियन्त्रणमा लिइएका १० जना हुनुपर्नेमा अन्यथा भएकोले सच्याइएको छ । -सम्पादक