भक्तपुर, १४ असार । भक्तपुरको बोडेमा एक १९ वर्षिय युवक र १८ वर्षिया युवती एकसाथ मृत अवस्थामा फेला परेका छन । मंगलवार विहान दुबैजना पासो लगाई झुन्डिएको अवस्थामा फेला परेका हुन् ।
महानगरीय प्रहरी परिसर भक्तपुरका सूचना अधिकारीसमेत रहेका डीएसपी रेवतीरमण पोखरेलका अनुसार बोडेमा बस्दै आएका सिन्धुपाल्चोक बाह्रबिसेका २१ वर्षीय जीवन तामाङ र रामेछापको बेथान घर भइ बोडेमै बस्दै आएकी १८ वर्षकी मंगली घिसिङ मंगलबार डेरामै झुण्डिएको अवस्थामा फेला परेका हुन् ।
स्थानीयको सूचनाको आधारमा पुगेको प्रहरीले उनीहरुलाई झ्यालको ग्रिलमा सलले पासो लगाई झुण्डीएको अवस्थामा मृत फेला पारेको बताएको छ ।
स्थानीयले उनीहरु प्रेममा परेर आत्महत्या गरेको हुनसक्ने अनुमान गरेका छन । पेशाले सवारी चालक रहेका युवक जीवन विवाहित भएकोले उनको बिबाहेत्तर सम्बन्धका कारण परिवारमा झगडा रहेको बताइएको छ । यद्यपी घटनाको अनुसन्धान भैरहेको प्रहरीको भनाइ छ ।
दुबैको शव पोस्टमार्टमका लागि त्रिवि शिक्षण अस्पताल काठमाडौं पठाइएको र अनुसन्धान जारी रहेको भक्तपुर प्रहरीले जनाएको छ ।
सच्याइएको : मंगलवार विहान हुनुपर्नेमा अन्यथा भएकोले सच्याइएको छ । -सम्पादक