भक्तपुर, १६ साउन सूर्यविनायकको गुन्डुमा एक बालक आत्महत्या गरेको अवस्थामा फेला परेका छन् । १२ वर्षिय बालक आत्महत्या गरेको अवस्थामा फेला परेका हुन् ।
सूर्यबिनायक नगरपालिका- ७ गुण्डुका राजु खतिवडाको १२ वर्षिय छोरा सन्देशले आत्महत्या गरेको बताइएको छ । महानगरीय प्रहरी परिसरका डीएसपी रेवतीरमण पोखरेलले घटनाको पुष्टी गर्दै बुधबार साँझ बालकले आत्महत्या गरेका बताए ।
उनका अनुसार बालक स्कूलको टाईको घाँटीमा पासो बनाइ आफ्नै घरको दोश्रो तल्लामा रहेको काठको दलिनमा झुण्डिएका थिए । छोरा झुण्डिएको देख्नासाथ उनका बुबाले पासो फुकाई ठिमीस्थित मध्यपुर अस्पताल पुर्याएका थिए । तर अस्पतालका चिकित्सकले उनलाई मृत घोषित गरिदिए ।
शवको पोष्टमार्टम पछि आफन्तलाई बुझाई पठाईएको र घटनाबारे थप अनुसन्धान भइरहेको महानगरिय प्रहरी परिसर भक्तपुरका सूचना अधिकारीसमेत रहेका डीएसपी रेवतीरमण पोखरेलले जानकारी दिएका छन् ।
मृतक सन्देश स्थानीय विद्यालयमा कक्षा ८ मा अध्ययनरत रहेको स्थानीयले भक्तपुर पोस्टलाई बताए । ३ दिदीका एक्ला भाइ उनी परिवारका कान्छा र एक्ला छोरा भएकोले पनि उनलाई नाबालक उमेरमै आत्महत्या सम्म पुर्याउने पारिवारिक तनाव नहुनु पर्ने स्थानीयको भनाइ छ । विद्यालयले पनि संदेश अनुशाशित विद्यार्थी रहेको र उनले विद्यालयमा कुनै तनाब व्यक्त नगरेको जनाएको छ । एक्लो छोराको रहस्यमय आत्महत्याले खतिवडा परिवार आँशुमा डुबेको छ भने सिंगो गुन्डु शोकाकूल बनेको छ ।