सहकारीमा बेलगाम बनेको ब्याजदरमा लगाम लाग्ने भएको छ । अब सहकारीले आफू खुसी ब्याज दर कायम गर्न नपाउने भएका हुन् ।

यसअघि आफूखुसी ब्याजदर निर्धारण गर्दै आएका सहकारीलाई सरकारले पहिलोपटक निक्षेप र कर्जा दुवैको ब्याजदरको सिमा तोकिदिएको हो । बैंक तथा वित्तीय सस्थाहरुमा जस्तै अब सहकारीमा पनि ब्याजको सीमा लागू गरिएको छ । शुक्रवार सहकारी विभागले सहकारी संस्थाहरूको निक्षेप र कर्जा दुवैको ब्याजदर सीमा तोकेको हो।

सहकारी विभागका रजिष्टारको संयोजकत्वमा बनेको १० सदस्यीय समितिले सहकारीमा ब्याजको सीमारेखा कायम गरेको पत्रकार सम्मेलन मार्फत जानकारी गराएको छ । बैंक तथा वित्तीय संस्थामा जस्तै निक्षेपमा दिने र कर्जामा लिने ब्याजदरको अन्तर ६ प्रतिशत कायम गरेको उक्त अवसरमा जानकारी गराएको छ ।

यसअघि कर्जा लगानीमा २५ प्रतिशतसम्म ब्याज लिदै आएका सहकारीले अब कर्जामा १६ प्रतिशतभन्दा बढी ब्याज लिन नपाउने भएका छन् भने निक्षेपमा न्युनतम १० प्रतिशत ब्याज दिनुपर्ने व्यवस्था गरिएको छ ।

अब निक्षेपमा न्युनतम १० प्रतिशत ब्याज दिनुपर्नेछ भने ऋणीबाट बढीमा १६ प्रतिशत ब्याज लिन पाउनेछन। यससंगै सहकारीमा पनि ब्याजमा स्प्रेड लागू भएको छ। सरकारले पहिलो पटक सहकारी संस्थाहरुको ब्याजदर तोकेको हो।

सहकारीले कर्जामा महङ्गो ब्याज लिने र निक्षेपमा कम ब्याज दिने भन्ने आलोचना भईरहेका बेला विभागले पहिलो पटक ब्याजदरको सिमा तोकेको हो।

यो ब्याजदर साउन १९ गतेबाट नै देशभरका सहकारीमा लागू हुने सहकारी विभागका रजिष्टार डा. टोकराज पाण्डेले बताए ।

अहिले देशभर सहकारी संस्थाहरूको संख्या करिब ३५ हजार छन् भने बचत तथा ऋण सहकारी संस्थाको संख्या करिब १४ हजार रहेको छ । सहकारीमा सदस्य रहेका लाखौ मानिसहरु यसबाट लाभान्वित हुने बताइएको छ ।