भक्तपुर, १८ साउन मानिसको जीवनमा अति आवश्यक वस्तुमा पर्न आउँछ, लत्ताकपडा । चाहे जाडो होस् या गर्मी आफ्नो जीउ ढाक्न कपडा नभई हुँदैन । त्यही कपडा कसैले बोरामा कोचेर राखेका हुन्छन् त कोही भने कपडा नपाएर जाडोमा जाडोले कठ्याङरिदैं बसेका हुन्छन् । यस्तै कोही भने बाढी या अन्य कुनै प्रकोपले गर्दा कपडा नहुने समस्यासँग जुधिरहेका हुन्छन् । यस्तैलाई सहयोग गर्न नेपालमा विभिन्न संस्थाहरु एनजिओ, आइनजिओ लागि परेका हामी सुन्ने गर्छौ ।
पछिल्लो समयमा भने धेरै चर्चामा आएको छ, हण्ड्रेड्स गु्रप नामकको टीम । यस टिमले बडो अचम्मको काम गरेको छ । अनामनगरमा पहिलो पटक कपडा बैङ्क खोलेर सबैलाई नै अचम्मित पारे । जहाँ दराजजस्तै गरी ह्याङ्रमा ज्याकेट, पाइट, टि–सर्ट र अन्य आवश्यक वस्तुहरु राखिएका हुन्छन् । जसलाई आवश्यक छ, उसले त्यहाँबाट लिएर जान्छन् । त्यो बैङ्क अहिले पनि चालू नै रहेको छ । यसकै सिको गरी ललितपुर र चितवनमा पनि कपडा बैङ्क खुलिसकेको छ ।
अब यसलाई भक्तपुरमा पनि संचालन गर्ने पक्रियामा रहेका छन्, फ्युजन नेपाल टिम र पद्म ज्योति फाउन्डेशन टिम । यी दुई संस्थाले पनि अब भक्तपुरमा आवश्यक परेका व्यक्ति, बालबच्चाहरुको लागि कपडा बैङ्क खुल्ने भएको छ । फ्युजन नेपाल टिमका डाइरेक्टर लक्ष्मी गौतमका अनुसार आउँदो शुक्रबार नै यस कामको प्रारम्भ गर्ने भएको छ । उनले भने, नराम्रो काम पो सिको गर्नु हुँदैन, राम्रो काम त छानी छानी गर्नुपर्छ, यदि यसरी कपडा बैङ्क खोले कसैलाई मद्धत पुग्छ भने हामी किन पछि पर्ने ? उनले प्रश्न गरे । बरु म त यस काममा तपाईहरुलाई पनि साथ दिनको लागि आग्रह गर्दछु ।”
कपडा बैङ्क खोल्नका लागि यी दुई संस्था मिलेर ठाउँसमेत छानी सकेका छन् । उनीहरुका अनुसार भक्तपुरकै श्री बाल सेवक आधारभूत विद्यालयको प्राङ्गणमा कपडा बैङ्क खोल्ने भएका हुन् । यो विद्यालय भक्तपुरको हनुमानघाटमा अवस्थित छ ।
घरका कुनै कुनामा रहेका नचाहिने कपडा, जुत्ता, ब्याग, खेलौना आदि सामान दिएर सहयोग गर्न सबैलाइ अभियन्ताहरुले अनुरोध पनि गरेका छन् ।