भक्तपुर, २० साउन भक्तपुरस्थित दिब्येश्वरी जग्गा अधिग्रहण आयोजनामा कार्यरत नायव सुब्बा अख्तियारको फन्दामा परेका छन् । लालपुर्जा बनाईदिने प्रयोजनको लागि सेवाग्राहीसँग घुस लिएपछि उनी अख्तियारको फन्दामा परेका हुन् ।
उक्त आयोजनामा कार्यरत देउमान कडरियालाई घुस रकम सहित रंगेहात पक्राउ गरिएको अख्तियार दुरुपयोग अनुसन्धान आयोगले जनाएको छ । आयोगको विशेष टोलीले कडरियालाई सोमवार समातेको हो ।
आयोगका प्रवक्ता प्रदीपकुमार कोइरालाका अनुसार उनलाई पेप्सीकोलास्थित दाजुभाई सेकुवा घरबाट घुस रकम सहित रंगेहात नियन्त्रणमा लिइएको छ । उनलाई सेवाग्राहीसंग ५० हजार घुस लिएको अवस्थामा रंगेहात समातिएको अख्तियारको दावी रहेको छ ।
कडरियामाथि थप अनुसन्धान कार्यवाही भइरहेको प्रवक्ता कोइरालाले बताएका छन् ।
त्यसैगरी अख्तियारले जनाए अनुसार मालपोत कार्यालय टीकापुर कैलालीमा कार्यरत नायव सुब्बा सिंहबहादुर कुँवर र खरिदार नरराज पाण्डे पनि पक्राउ परेका छन् । उनीहरुलाई हराएको जमिनको लालपुर्जाको प्रतिलीपि बनाउने प्रयोजनको लागि जग्गा नाप जाँच गरिदिए बापत घुस लिएको अवस्थामा रंगेहात पक्राउ गरिएको छ भने उद्योग, वाणिज्य तथा उपभोक्ता हित संरक्षण निर्देशनालय, हेटौंडा मकवानपुरका अधिकृत चन्दनकुमार अमात्यलाई पनि आयोगले पचास हजार घुस लिइसकेको अवस्थामा पक्राउ गरेको अख्तियारका प्रवक्ता कोइरालाले जानकारी दिएका छन् ।