भक्तपुर, २१ साउन भक्तपुरको सल्लाघारीस्थित तिनकुने ट्राफिक लाइटमा मंगलवार स्थिति तनावग्रस्त बन्न पुग्यो । ट्राफिक प्रहरीले एक यात्रुवाहक बसलाई कारवाही गर्न खोज्दा यात्रीले प्रतिरोध गरेपछि स्थिति तनावग्रस्त बनेको हो ।
बा ५ ख १५४५ नम्बरको यात्रुबाहक बसले ढोका नलगाई बस चलाएको भन्दै ट्राफिक प्रहरीले बस नियन्त्रणमा लिएपछि यात्रीले प्रतिरोध गरेका थिए । मंगलवार साँझ करिव ६ बजेको समयमा बस नियन्त्रणमा लिई बसका चालकसंग प्रहरीले कागजपत्र मागेको थियो । चालक-प्रहरी बीच समन्वय गर्न गएका केहि यात्रीलाई एक प्रहरीले गोली हानी दिने भनेर ताकेपछि उनीहरु भड्किएका थिए ।
बसमा सवार यात्री सर्वसाधारण नपरेपछि प्रहरीलाई आच्छु आच्छु परेको थियो । खासमा उक्त बस धुलिखेलबाट निजामती कर्मचारी बोकेर काठमाडौ जादैं गरेको मयुर यातायातको बस थियो । प्रहरीले सर्वसाधारणलाई थर्काए झैँ उनीहरु थर्किनेवाला थिएनन । उनीहरुले उल्टै प्रहरीलाई नै थर्काईरहेका थिए ।
प्रहरीको ब्यवहारको विषयलाई लिएर यात्रीहरु आक्रोसित भएपछि बीच सडकमै प्रहरी-यात्री बिबादले उग्र रुप लिनपुग्यो । करीव १५ मिनेटसम्म चलेको विवादका कारण अन्य सवारी आवागमन समेत प्रभावीत बनेको थियो । अन्त्यमा, महानगरीय प्रहरी प्रभाग, कटुन्जेका प्रहरी सहायक निरीक्षक मनोज साह स्थितिलाई साम्य बनाउन सफल भए । उनले बसलाई कारवाही नगर्ने भन्दै यात्रीहरुलाई सम्झाइबुझाई पठाएका थिए ।