भक्तपुर, २२ साउन नेपाल मजदुर किसान पार्टी(नेमकिपा) ले भारतले जम्मु–कश्मीर र अक्साई चीनबारे लिएको निर्णयको विरोध गरेको छ । अध्यक्ष नारायणमान बिजुक्छेँ (रोहित) को अध्यक्षतामा बुधबार बसेको केन्द्रीय बैठकले उक्त निर्णय लिएको हो ।
मोदी सरकारको जम्मु–काश्मीर र अक्साई चीनबारे लिएको कदम सार्क देशको हितमा नभएको नेमकिपाको ठहर छ । नेमकिपाका सचिव प्रेम सुवालले एक प्रेस बिज्ञप्ति मार्फत नेमकिपाको धारणा स्पष्ट पारेका हुन । भारत सरकारको कदम कुख्यात तानाशाह हिटलर र मुसोलिने शैलीको भएको भन्दै नेमकिपाले बिरोध जनाएको हो ।
हेर्नुस् प्रेस बक्तब्य
नरेन्द्र मोदी नेतृत्वको भारत सरकारले जम्मू-कश्मीर राज्यलाई विशेषाधिकार दिने संवैधानिक प्रावधान खारेज गरिदिएको छ । सोमवार राष्ट्रपति रामनाथ कोविन्दले जम्मू-कश्मीरलाई विशेषाधिकार दिएको संविधानको धारा ३७० र अनुच्छेद ३५ ए खारेज गरेको सूचना जारी गरेका हुन् ।
जम्मू-कश्मीरलाई केन्द्रीय सरकार मातहत रहने भन्दै अहिले कश्मीरमा भारतले हजारौँ सैनिक परिचालन गरेर राखेको छ । भारत सरकारले जम्मू-कश्मीरलाई छुट्टै राज्यकोरुपमा स्वीकार नगरेपछि भारत-प्रशासित कश्मीर बन्द छ । त्यहाँका इन्टरनेट र फोन सेवा समेत बन्द गरिएका छन् भने त्याहाँ के भैरहेको छ भन्ने कुरा थाहाँ हुन सकिरहेको छैन ।
चिसो सम्बन्धबाट गुज्रिरहेको भारत पाकिस्तान सम्बन्ध जम्मू-कश्मीरको विषयलाई लिएर झन् बिग्रिएको छ । पाकिस्तानले भारतीय उच्चायुक्तलाई देश निकाला गर्ने र भारतसँगको व्यापार रोक्ने बताएको छ ।
पाकिस्तानी प्रधानमन्त्री इमरान खानले जम्मू-कश्मीरको विशेष हैसियत खोस्ने भारतको निर्णयविरुद्ध संयुक्त राष्ट्रसङ्घको सुरक्षा परिषद्मा समेत प्रतिवाद गर्ने बताएका छन् ।
चीनले मङ्गलबार एक वक्तव्य जारी गरी जम्मु–कश्मीर माथि भारत सरकारले चालेको कदममा आफ्नो असहमती रहेको सार्वजनिक गरिसकेको छ ।