भक्तपुरको हनुमानघाटस्थित श्री बाल सेवक आधारभूत विद्यालयको प्राङ्गणमा फ्युजन नेपाल र पद्म ज्योति फाउन्डेसनको सहकार्यमा कपडा बैंकको उद्घाटन गरिएको छ ।

शुुक्रबार  विद्यालय व्यवस्थापन समितिका अध्यक्ष कृष्णगोविन्द खाईजुको प्रमुख आतिथ्यमा बैंकको उद्घाटन गरिएको हो ।

उक्त अवसरमा प्रमुख अतिथि खाइजुले आफ्नो  प्रयोगमा नआएको कपडा अव्यवस्थित रुपमा फालेर वातावरण बिगार्नु भन्दा दान गरेर पुन्य कमाउनु पर्नेमा जोड दिए । कपडा बैंकले घरमा थन्किएका अनावश्यक लत्ताकपडाको ब्यवस्थापन गर्ने र आवस्यक मानिसलाई उपलब्ध गराउने उनले बताए ।

कपडा बैैैंक अभियन्ता फ्युजन नेपालकी प्रमुख लक्ष्मी गौतमले कपडा बैंकमा कपडा मात्र नभएर जुत्ता र खेलौना पनि राखिने भन्दै त्यसका  लागि सहयोग गर्न आग्रह गरिन ।

खोलिएको कपडा बैंक स्थानीयले अभिरुचिपूर्वक अवलोकन गरेका र आवस्यक सहयोग समेत प्राप्त भएको भन्दै गौतमले सन्तुष्टि व्यक्त गरिन ।

गौतमले दिएको जानकारी अनुसार बैंकमा धेरै कपडाको आज लिनेदिने कार्य भएको छ भने कपडा लाने केहि बुढापाकाले सित्तैमा किन लानु भनेर आफूले सकेको रकम पेटिकामा हाली आर्थिक सहयोग पनि गरेका छन् ।

उक्त कपडा बैंक उद्घाटन कार्यक्रम बालसेवक आधारभूत विद्यालयका प्राचार्य जयपाल हरि कायस्थको सभापतित्वमा सम्पन्न भएको थियो ।

तस्वीर : निशा कुस्मा