भक्तपुर, २६ साउन भक्तपुरमा एकाविहानै भयानक सडक दुर्घटना भएको छ । दुर्घटनामा परि १६ जना घाइते भएका छन् ।
आइतवार विहान करिब साढे छ बजेको समयमा मध्यपुर ठिमी नगरपालिका-३ गठ्ठाघरमा रहेको ६ लेन सडकको आकाशेपुल मुनी भयानक सडक दुर्घटना भएको हो । काठमाण्डौबाट सिन्धुली तर्फ जाँदै गरेको बा ४ ख ५७९४ नम्बरको बस आफै अनियन्त्रित भई ३ वटा बसलाई ठक्कर दिएको थियो । बा ४ ख ५७९४ नम्बरको बस आफै अनियन्त्रित भई एउटै दिशा तर्फ जादै गरेको बा ३ ख ७०९३, बा ५ ख ४०२९ र ना ६ ख ७१८५ नम्बरको ३ वटा बसलाई ठक्कर दिँदा उक्त सवारी साधनमा यात्रारत १६ जना यात्रीहरु घाईते भएका भक्तपुर प्रहरीले जनाएको छ ।
घाइतेमध्ये १३ जनालाई उपचारका लागी गठ्ठाघर स्थित नागरिक अस्पतालमा राखिएको छ भने ३ जनालाई ठिमीस्थित मध्यपुर अस्पतालमा पुर्याइएको प्रहरीको भनाइ छ । सबै घाईतेहरु खतरामुक्त रहेको अस्पतालले जनाएको छ ।
प्रहरीले ४ वटै बस सहित ठक्कर दिने बस चालक सिन्धुलीको गोलन्जोर गाउँपालिका- ६ घर भई हाल काठमाण्डौ ताहचल बस्ने बर्ष ३०को दिपकराज ठकुरीलाई नियन्त्रणमा लिएर थप अनुसन्धान गरिरहेको महानगरीय प्रहरी परिसर भक्तपुरका डीएसपी रेवतीरमण पोखरेलले जानकारी दिएका छन् ।
