भक्तपुर, २७ साउन चिनजानको मान्छे अथवा छिमेकी हो भन्दैमा सबैलाई विश्वास गर्न नहुने अवस्था आएको छ ।
भक्तपुरको सूर्यविनायक नगरपालिका-१ दधिकोटका ५२ वर्षीय तीर्थराज न्यौपानेले आफ्नै टोलकी एक बालिकलाई बलात्कार गरेको आरोपमा पक्राउ परेको घटना सेलाउन नपाउदै काठमाडौ महानगरपालिकाका एक कर्मचारी पनि यस्तै अपराधमा संलग्न भएको पाइएको छ ।
काठमाडौं महानगरपालिकाका कुचीकार प्रमुख ५२ वर्षीय बाबुराज पुजारी बलात्कार आरोपमा पक्राउ परेका छन् ।
काठमाडौं महानगरपालिका–१७ घर भएका ५२ वर्षीय पुजारीले ११ वर्षीया बालिकामाथि बलात्कार गरेको आरोपमा पक्राउ परेका हुन् ।
पुजारीलाई आइतबार साँझ अनामनगरबाट पक्राउ गरिएको महानगरीय प्रहरी परिसर काठमाडौंका प्रवक्ता, डिएसपी होविन्द्र बोगटीले जानकारी दिए ।
बोगटीका अनुसार पीडित पक्षको उजुरीका आधारमा पुजारीलाई पक्राउ गरिएको हो । पुजारी अहिले महानगरीय प्रहरी बृत्त जनसेवाको हिरासतमा छन् ।
बालिकाका आमाबुवासँग राम्रो चिनजान भएका पुजारीले घरमा एक्लै भएको अवस्थामा बालिकामाथि बलात्कार गरेको प्रहरीको प्रारम्भिक अनुसन्धानबाट खुलेको छ ।