भक्तपुर, १ भदौ सुन्दर यातायात प्रालिले काठमाडौं-भक्तपुर विद्युतीय बसहरु संचालन गर्ने भएको छ । भदौ दोस्रो साताबाट विद्युतीय बसहरु संचालन गरिने भएको हो ।
सूर्यविनायक, कोटेश्वर, बानेश्वर, वीर अस्पतालदेखि जमलसम्मको यात्रा अब विद्युतीय बसहरु बाट गर्न सकिने सुन्दर यातायातले जानकारी गराएको छ । त्यसैगरी गोंगबुदेखि सामाखुसी, गौशाला, कोटेश्वर हुदै सल्लाघारीसम्म पनि उक्त यातायात संचालन हुने सुन्दर यातायातका अध्यक्ष भेष बहादुर थापाले भक्तपुर पोस्टसंग भने ।
त्यसको लागि रुट परमिट लिईसकिएको र भदौ दोस्रो साताबाट नै यातायात संचालन गरिने बताइएको छ । यातायातले काठमाडौको चक्रपथ र भित्रि रुटहरुमा पनि बस संचालनको तयारी गरेको जानकारी प्राप्त भएको छ । काठमाडौमा एक कार्यक्रमका बीच आइतवार उक्त जानकारी गराइएको हो ।
बसमा एलइडी, सिसि क्यामरा, जिपिएस, उभिएर यात्रा गर्नेको लागि ह्याङ्गर रहनुका साथै बसहरु अपांगमैत्री रहेको सुन्दर यातायातले बताएको छ ।
भाडा लेनदेनमा सहजताको लागि मोबाइलबाटै पैसा तिर्न मिल्ने प्रविधिसमेत रहेको सुन्दर यातायातका अध्यक्ष भेष बहादुर थापाले जानकारी दिएका छन् । ”ई पेमेन्ट गेट वे प्रयोग गरेर मोबाइलबाटै भाडा तिर्न सक्ने व्यवस्था मिलाइएको छ । नगद भाडा तिर्दा भने गाडीमा राखिएको डब्बामा पैसा खसाल्नुपर्छ ।” उनले भने ।
