भक्तपुर, ८ भदौ मध्यपुर थिमी नगरपालिका वडा नम्बर–७ मा एकाविहानै एक युवक झुन्डिएको अवस्थामा फेला परेका छन् । धुन्चेपाखास्थित आफ्नै घरमा उनी झुन्डिएको अवस्थामा फेला परेका हुन् ।
स्थानीय युवक अन्दाजी २५ वर्षिय अविशेक श्रेष्ठको शव आफ्नै घरमा झुन्डिएको अवस्थामा फेला परेको वडाध्यक्ष कृष्ण कुमार प्रजापतिले पुष्टि गरेका छन् । घरको आफू सुत्ने कोठामा उनी मृत फेला परेका हुन् । इञ्जिनियरिङ्गका बिद्यार्थी रहेका श्रेष्ठ परिवारका जेठा छोरा हुन् । उनले आफ्नै कोठामा नाइलनको डोरीको पासो लगाई आत्महत्या गरेको अवस्थामा फेला परेका वडासदस्य सुजन पौडेलले भक्तपुर पोस्ट संग भने । उनका अनुसार आइतवार विहान अबेरसम्म अविशेक नउठेपछि हेर्न जाँदा परिवारका सदस्यले उनलाई झुन्दिएको अवस्थामा देखेका थिए ।
झुन्डिएको अवस्थामा शव देखेपछि परिवारले बिहान करिब ८ बजे प्रहरीलाई खबर गरेका थिए । प्रहरीले मुचुल्का उठाई श्रेष्ठको शवलाई यतिबेला पोष्ट मार्टमको लागि भक्तपुर अस्पताल पुर्याएको बताइएको छ । घटनाको अनुसन्धान भैरहेको महानगरी प्रहरी वृत्त थिमीको भनाइ छ ।
यसैबीच आइतवार अपरान्ह चाँगुनारायण नगरपालिका वडा नम्बर ५ स्थित छालिङको जंगलमा पनि एक शव झुन्डिएको अवस्थामा फेला परेको छ ।
महानगरीय प्रहरी परिसर भक्तपुरका सूचना अधिकारी समेत रहेका डीएसपी रेवती रमण पोखरेलले घटनाको पुष्टि गर्दै शव झुन्डिएको अवस्थामा फेला परेको स्थानीयको सूचनाको आधारमा प्रहरी त्यसतर्फ गएको बताए ।
उनका अनुसार मृतकको सनाखत भैसकेको छैन ।