भक्तपुर, ११ भदौ
भक्तपुर, ११ भदौ मालपोत कार्यालय भक्तपुरमा कार्यरत रहेका नायब सुब्बा हरिनारायण उपाध्याय र लेखापढी व्यवसायी हीरामणि निरौला लाई अख्तियार दुरुपयोग अनुसन्धान आयोगले भ्रष्टाचार गरेको ठहर गर्दै मुद्दा दायर गरेको छ ।
घुस खाएको आरोपमा पक्राउ परेका उपाध्याय र निरौला माथि अख्तियारले अनुसन्धान गर्दा भ्रष्टाचारी भएको ठहर गरेको र उनीहरु विरुद्ध बबरमहलस्थित विशेष अदालतमा मुद्दा दायर गरिएको हो ।
कार्यालय समयमा सेवाग्राहीको भीडभाड बढी हुने भनी लेखापढी व्यवसायी निरौलाले काम सहज गरिदिने भन्दै सेवाग्राहीसँग ४ हजार रुपियाँ घुस लिएको अभियोग छ । निरौलामार्फत नायब सुब्बा उपाध्यायले घुस लिएको पाइएको अख्तियारको जिकिर छ ।
उनीहरुउपर मंगलवार बिगो बमोजिम कारवाहीको माग गरी विशेष अदालतमा मुद्दा दायर गरिएको आयोगका प्रवक्ता प्रदीपकुमार कोइरालाले जानकारी दिए ।