तस्वीर : सांकेतिक

भीषण पहिरोमा परि जाजरकोटमा तीन जनाको ज्यान गएको छ ।

भेरी नगरपालिका–२ मा पहिरोले घर पुर्दा एकाघरका ३ जनाको ज्यान गएको हो ।

शनिबार राति करिब १ः४५ बजे गएको पहिरोले ३२ वर्षीया पार्वती वली, उनकी छोरीहरु नौ वर्षीया मोतीकला र तीन वर्षीया धनसरा घरसँगै पुरिएका हुन् । घरमुली बलबहादुर घरबाहिर सुतेका कारण बाँच्न सफल भएको बताइएको छ ।

यसैबीच भक्तपुरको लोकन्थलीमा पनि पहिरो गएका कारण मानिसहरु घर छोड्न बाध्य बनेका छन् । भक्तपुरको मध्यपुर थिमी नगरपालिका वडा नम्बर १स्थित लोकन्थली हाइटमा पहिरोका कारण स्थानीय त्रसित बनेका छन् । एक साता अघि पहिरो गएको यो क्षेत्रमा पुन: पहिरो गएपछि स्थानीय त्रसित बनेका हुन् ।

वडाध्यक्ष सुरज खड्काले भने एउटा घर मात्र जोखिममा रहेको र अन्यको अवस्था सामान्य भएको भक्तपुर पोस्टलाई जानकारी गराएका छन् । उनका अनुसार स्थानीय सन्तोष तामाङको अढाई तले घर जोखिममा रहेको छ ।

यस अघि गएको पहिरो रोक्न नगरपालिकाले पर्खाल बनाइरहदा अर्को तर्फबाट पहिरो गइ सडक भासिएको भन्दै वडाध्यक्ष खड्काले जनताको जीउधनको सुरक्षा गर्न स्थानीय सरकारले कुनै कसर बाँकी नराख्ने जिकिर गरे ।