खोटाङ, १८ भदौ खोटाङमा भुस्याहा कुकुरलाई निर्ममतापुर्वक मारेको भन्दै मेयरसहित तीन जनाविरुद्ध जाहेरी परेको छ। दिक्तेल रुपाकोट मझुवागढी नगरपालिकामा भुस्याहा कुकुर नियन्त्रणका क्रममा निर्ममतापुर्वक चिरुवा दाउराले टाउकामा कुटेर मारेको भन्दै मेयर दिपनारायण रिजाल, कुकुर नियन्त्रणका क्रममा खटिएका दिक्तेलका खेलराज आचार्य र भोजपुर घर भइ हाल मेयर रिजालको घरमा बस्दै आएका श्रेष्ठ थरका एक जना कामदारविरुद्ध जिल्ला प्रहरी कार्यालयमा उजुुरी परेको हो।
घर पालुवा तथा सामुदायिक पशु (कुकुर)लाई निर्दयी व्यवहार गर्नुका साथै निर्ममतापुर्वक मारेको भन्दै मंगलबार खोटाङकै जन्तेढुंगा गाउँपालिकाका बाजिन्द्र बिष्ट, स्नेहाज केयरका पशु प्राविधिक सुमनकुमार श्रेष्ठ, नेपाल भेटेनरी एसोसिएसनका डा. सिताराम यादवले उजुरी दिएको जिल्ला प्रहरी कार्यालय खोटाङका प्रहरी निरिक्षक आमोदकुमार खेरवारले बताए। चिरुवा दाउराले मुखमा, टाउकामा कुट्ने, झुण्ड्याउने र विषसमेत प्रयोग गरी सार्वजनिक स्थलमा कुकुरलाई मारेको तथा कतिपयलाई अचेत अवस्थामा खाल्डोमा पुरेकाले मुलुकी अपराध संहिता २०७४ परिच्छेद २७ पशुपंक्षी सम्वन्धी कसुर बमोजिम अपराध भएकाले सो अनुुसार कानूनी कारबाहीका लागि उजुरी दिइएको जनाइएको छ।
गत शनिबार बिहान दिक्तेलको त्रिबेणीचोकमा भुस्याहा कुकुरलाई कुटेर मारिएको भिडियो फेसबुकमार्फत सार्वजनिक भएको थियो। कुकुर नियन्त्रणका क्रममा खटिएका व्यक्तिले टाउकामा दाउराले हिर्काएर कुकुर मारेको भिडियो बाहिरिएपछि सामाजिक सञ्जालमा पक्ष÷विपक्षमा बहस चलिरहेको छ। सामाजिक सञ्जालमा पनि कुकुर मारेको विषयभन्दा पनि मार्नेक्रममा अपनाइएको शैलीका विषयमा बढि प्रश्न उठिरहेको देखिएको छ। मेयर दिपनारायण रिजाल सचिवालयले भने भुस्याहा कुकुरलाई हैजा लागेको कारण मर्न थालेको र मरेका कुकुरलाई व्यवस्थापन गर्नेक्रममा बाटोमा एउटा कुकुरले जनावरलाई टोकेर भाग्दै गर्दा अरुलाई पनि टोक्ने सम्भावना भएकाले केही व्यक्तिले नियन्त्रण गर्ने क्रममा कुटपिट गरि मारिएको जानकारी आएको जनाएको छ।
दिक्तेलमा कुकुरलाई निर्मम तरिकाले मारेको घट्ना बाहिरिएपछि स्नेहाज केयर र नेपाल भेटेनरी एसोसिएसनको टोली सोमबार आइपुगेको थियो। सो टोलीले मंगलबार बिहान ६/७ वटा कुकुरको उपचार गरेर फर्किएको नागरिक दैनिकमा खबर छ।