भक्तपुर, १९ भदौ भक्तपुर नगरपालिकाका प्रमुख सुनिल प्रजापतिले भक्तपुर नगरपालिकाद्वारा सञ्चालित कलेजहरुमा जनताको लगानी रहेको भन्दै यसमा अध्ययनरत विद्यार्थीहरुमा समाजप्रतिको उत्तरदायित्वबोध हुनुपर्नेमा जोड दिएका छन् ।
बुधबार ख्वप बहुप्राविधिक अध्ययन संस्थान पहिलो वर्षमा भर्ना भएका विद्यार्थीहरुको अभिमुखीकरण कार्यक्रममा बोल्दै कलेज व्यवस्थापन समितिका अध्यक्ष समेत रहेका प्रमुख प्रजापतिले नर्सिङ पेशामार्फत बहुसंख्यक जनताको हितमा काम गर्न प्रेरित गरेका थिए । उनले नर्सिङ अध्ययन गर्ने विद्यार्थीहरुको व्यवहार राम्रो हुनुपर्ने, सरसफाइमा र अनुशासनमा ध्यान दिनुपर्ने पनि बताए ।
नयाँ पुस्ताका विद्यार्थीहरुमा विदेश जाने, धेरै पैसा कमाउने, बिलासी जीवन जिउनेजस्ता सुविधाभोगी बानी विकास भइरहेकोप्रति सचेत पार्दै प्रमुख प्रजापतिले आफ्नो मिहिनेत र सीप देशकै माटोमा प्रयोग गर्न मार्गनिर्देशन गरे ।
उक्त अवसरमा वडा नं. ९ का वडाध्यक्ष एवम् कलेज व्यवस्थापन समितिका सदस्य रबिन्द्र ज्याख्वले नर्सिङका विद्यार्थीहरुले सेवा गर्ने भावनाको विकास गर्नुपर्ने आवश्यकता औल्याएका थिए ।
कार्यक्रममा ख्वप बहुप्राविधिक अध्ययन संस्थानका प्राचार्य डा. रत्नसुन्दर लासिवाले विद्यार्थीहरुले धेरै समय सामाजिक सञ्चालमा खर्चिंदा पढाइमा असर पुग्ने र पढाईप्रति ध्यान नजाने हुँदा यसतर्फ विद्यार्थीहरुलाई सचेत हुन आग्रह गरेका थिए भने नर्सिङ विभागका विभागीय प्रमुख सुमित्रा बुढाथोकीले विषयवस्तुको ज्ञान, आत्मविश्वास र मिहिनेत योग्य नर्स बन्न आवश्यक औजार भएको भन्दै योग्य नर्स उत्पादन गर्न कलेज प्रतिबद्ध रहेको बताइन ।