भक्तपुर, २० भदौ भक्तपुरमा घर प्लास्टर गर्ने क्रममा लडेर एक कामदारको ज्यान गएको छ भने अर्का कामदार गम्भीर घाइते भएका छन् ।
ज्यान जानेमा भारत घर भई हाल काभ्रेको बनेपा बस्दै आएका ५० वर्षीय राजु अन्सारी रहेका छन् भने सोही ठेगानाका १८ वर्षीय सहजात अन्सारी गंभीर घाइते भएका भक्तपुर प्रहरीको भनाइ छ ।
भक्तपुर नगरपालिका-७ ग्वाछे टोलमा ४ तले पक्की घरको तेस्रो तला बाट खस्दा उक्त दुर्घटना भएको हो । स्थानीय गणेश सुवालको घरको बाहिरी भित्ता प्लास्टरको काम गर्दैगरेका कामदारहरु शुक्रवार दिउसो दुर्घटनामा परेका थिए ।
प्रहरीका अनुसार काम गर्ने क्रममा बासको खट भाचिएपछि दुई व्यक्तिहरु खसेर घाईते भएका कामदार द्वयलाई प्रहरीले उद्धार गरी भक्तपुर अस्पताल पुर्याएको थियो ।
उपचारकै क्रममा राजुको ज्यान गएको र सहजात थप उपचारको लागी काठमाडौस्थित वीर अस्पतालको ट्रमा सेन्टर रिफर गरिएको बताइएको छ । दुर्घटनाबारे थप अनुसन्धान कार्य भई रहेको महानगरीय प्रहरी परिसर भक्तपुरका सूचना अधिकारी रहेका डीएसपी रेवती रमण पोखरेलले बताए ।