News Portal

  • ३ लाख नगद सहित मेधा मावि पुरस्कृत : सोमवार पुरस्कारसहित र्यालीको तयारी

    हिना सुवाल / भक्तपुरपोस्ट भक्तपुर, २२ भदौ
    २६९७ पटक
    भक्तपुर, २२ भदौ

    ४० औं राष्ट्रिय शिक्षा दिवस तथा ५३ औं अन्तर्राष्ट्रिय साक्षरता दिवसका अवसर पारेर देशका उत्कृष्ट विद्यालयहरुलाई पुरस्कृत गरिएको छ ।

    आइतवार विशेष कार्यक्रमका बीच शिक्षा, विज्ञान तथा प्रविधि मन्त्रालयले देशभरबाट छानिएका उत्कृष्ट विद्यालयलाई पुरस्कृत गरेको हो ।

    काठमाडौको कमलादीस्थित नेपाल प्रज्ञाप्रतिष्ठानमा आयोजित भव्य कार्यक्रममा १२ विद्यालय र ३ क्याम्पस त्यसैगरी ३ प्राविधिक शिक्षालयहरु पुरस्कृत भएका हुन् । सरकारका उपप्रधान तथा रक्षा मन्त्री ईश्वर पोखरेलले उनीहरुलाई शिल्ड, ध्वजा, प्रमाणपत्र र नगद सहित पुरस्कृत गरेका हुन् ।

    माध्यमिक शिक्षा परीक्षा कक्षा १०(एसइई) तर्फ सामुदायिक विद्यालयहरुमा उत्कृष्ट नतिजा निकाल्दै तेखाखुपुस्थित भक्तपुरको मेधा माध्यमिक विद्यालयले प्रथम स्थानसहित उत्कृष्ट विद्यालयको पुरस्कार प्राप्त गरेको छ । उत्कृष्ट विद्यालय छनौट सम्बन्धी मापदण्ड बनाएर मुल्यांकन गर्दा मेधाले देशभरमै प्रथम स्थान हासिल गर्न सफल भएको हो । १० कक्षाको परीक्षाफल र ९ कक्षाको विद्यार्थी रजिस्ट्रेसनको आधारमा गरिएको मूल्यांकनमा मेधाले ९०.०१ नम्बर प्राप्त गर्दै पहिलो विद्यालय बन्न पुगेको हो ।

    शिल्ड, ध्वजा, प्रमाणपत्र र नगद ३ लाख सहित भव्य कार्यक्रमका बीच आइतवार मेधा मावि पुरस्कृत भएको छ । मेधा माध्यमिक विद्यालयको नेतृत्व गरी पुरस्कार ग्रहण गर्न प्रधानाध्यापक गंगाधर हाडाको नेतृत्वमा शिक्षक प्रतिनिधिहरु प्रज्ञा भवन पुगेका थिए । उनीहरुले उपप्रधानमन्त्री इश्वर पोखरेल र शिक्षा मन्त्री गिरिराजमणि पोखरेलको हातवाट शिल्ड, ध्वजा, प्रमाणपत्र र नगद ३ लाखको चेक ग्रहण गरिरहदा दर्शकदीर्घामा रहेका मेधाका विद्यार्थीले ताली बजाएर खुशी व्यक्त गरेका थिए ।

    मेधा माविले सोमवार उक्त पुरस्कारसहित र्याली गरी उक्त खुशी साट्ने कार्यक्रम तय गरेको जानकारी भक्तपुर पोस्टलाई प्राप्त भएको छ । विद्यालयले कक्षा सकिएपछि सोमबार बेलुकी विद्यार्थी र शिक्षकसहित र्याली निकाल्न लागेको हो । भक्तपुरको दरवार स्क्वायर सम्म र्याली गरी सभामा परिणत हुने बताइएको छ ।

    यस्तै, देशभरबाट एसइई परीक्षामा उत्कृष्ट नतिजा ल्याइ द्वितीय हुन सफल तम्घास गुल्मीको रेसुङ्गा माध्यमिक विद्यालय शिल्ड, ध्वजा, प्रमाणपत्र र नगद २ लाख सहित पुरस्कृत भएको छ भने तृतीय स्थान हासिल गर्न सफल बालाजु काठमाडौंको तरुण माध्यमिक विद्यालय शिल्ड, ध्वजा, प्रमाणपत्र र नगद १ लाख सहित पुरस्कृत भएको छ ।

    यसैगरी सोही समूहमा संस्थागत विद्यालयहरुतर्फ एसइई परीक्षामा उत्कृष्ट नतिजा ल्याइ प्रथम स्थान हासिल गर्न सफल कपन, काठमाडौंको रिलायन्स ईण्टरनेशनल एकेडेमी, द्वितीय साँगा काभ्रेको नेपाल प्रहरी माध्यमिक विद्यालय र तृतीय बानेश्वर काठमाडौंको भ्याली भ्यु ईङ्लीस स्कुल पनि पुरस्कृत भएका छन् ।

    माध्यमिक शिक्षा उत्तीर्ण परीक्षा अन्तर्गत १२ कक्षा सम्म सञ्चालित विद्यालयबाट सामुदायिक तर्फ कास्की पोखराको अमरसिंह मावि, मोरङ ईन्द्रपुरको सुकुना मावि र पर्वत फलेवासको भवानी विद्यापीठ क्रमशः प्रथम, द्वितीय र तृतीय भएका छन् ।

    यस्तै सोही समुह अन्तर्गत संस्थागत तर्फ क्रमशः कास्कीकै एसओसएस हर्मन माईनर प्रथम, काभ्रे साँगाको नेपाल प्रहरी मावि द्धितीय र सेण्ट जेभियर्स कलेज माईतीघर काठमाडौं तृतीय भएका छन् ।

    यसैगरी, विश्वविद्यालय अनुदान आयोगबाट छनोट भइ आंगिक क्याम्पस तर्फ ललितपुरको पुल्चोक क्याम्पस, सामुदायिक क्याम्पस तर्फ जे. एस. मुरारका बहुमुखी क्याम्पस लाहान, सिरहा र काठमाडौंको बर्नहार्ट कलेज नगद २ लाख ५० हजार सहित पुरस्कृत भएका छन् ।

    यस्तै, प्राविधिक शिक्षा तथा व्यवसायिक तालिम परिषद्बाट आंगिक शिक्षालयहरुमध्ये छनोट भई बालाजु स्कूल अफ इन्जिनियरिङ एण्ड टेक्नोलोजी, परिषद्बाट सम्बन्धन प्राप्त गरी साझेदारीको रुपमा सञ्चालित शिक्षालयहरुतर्फ तानसेन स्कूल अफ हेल्थ साइन्स र सामुदायिक विद्यालयहरुमा प्राविधिक शिक्षा सञ्चालन गर्ने विद्यालयहरु मध्ये जनज्योति माध्यमिक विद्यालय सिन्धुली नगद एक लाख सहित पुरस्कृत भएका छन् ।

    प्रतिकृया दिनुहोस्

    महिलाहरु रक्तदानमा पछि, जीवनदानको रुपमा रहेको रक्तदानप्रति प्रेरित गर्नुपर्नेमा जोड

    रक्तदानलाई ‘जीवन दान’ को रुपमा श्रद्धाले ग्रहण गरिने भएपनि यसप्रति महिला वर्गलाई आकर्षित गर्न नसकिएको...

    भक्तपुरका ४ पत्रकारलाई पत्रकार महासंघको पुरस्कार र सम्मान

    sanjeep ghimire shubhachintak fnj

    नेपाल पत्रकार महासंघ जिल्ला शाखा भक्तपुरले जिल्लाका ४ पत्रकारलाई पुरस्कृत गरेको छ । शाखाले आफ्नो...

    राष्ट्रका लागि दुई घण्टा अभियानमा पूर्व प्रधानमन्त्री ओलीको ऐक्यवद्धता

    भक्तपुरबाट शुरु गरिएको ‘राष्ट्रका लागि दुई घण्टा अभियान’ मा पूर्व प्रधानमन्त्री केपी शर्मा ओलीले ऐक्यवद्धता...

    ४ चिनियाँ नागरिक भक्तपुरमा पक्राउ

    भक्तपुरको सूर्यविनायक नगरपालिका वडा नं. १० भातेढिकुर स्थित अरनिको हाइवे बाट ४ चिनियाँ नागरिक पक्राउ...

     नेपालमा सुनको नयाँ किर्तिमान

    नेपाली बजारमा सुनको मूल्यले नयाँ किर्तिमान बनाएको छ । विहिबार सुन तोलामा १८ सयले बढेर...