भक्तपुर, ३० भदौ काठमाडौँ महानगरपालिकाको निमन्त्रणमा आएको विदेशी पाहुना टोलीले भक्तपुरको सम्पदाको अवलोकन भ्रमण गरेको छ । आइतवार उक्त टोलीले भक्तपुरको भ्रमण गरेको हो ।
विश्व सम्पदा सूचीमा पर्ने भक्तपुरको दरबार स्क्वायर क्षेत्र लगायतमा विदेशी पाहुनाहरुले अभिरुचीपूर्वक अवलोकन भ्रमण गरेका हुन् । भारतको उत्तरी दिल्ली नगरपालिकाका प्रमुख सरदार अवतार सिंह त्यसैगरी भुटानको थिम्पु नगरका प्रमुख किन्ले दोर्जी लगायत बिभिन्न देशका नगर प्रमुखहरु भक्तपुर भ्रमणमा सहभागी भएका थिए ।
भारतको उत्तरी दिल्ली नगरपालिकाका प्रमुख सरदार अवतार सिंह भक्तपुरको सम्पदा अवलोकन बाट औधी खुशी देखिए । उनले यहाँका सम्पदाबारे आफ्नो नगरवासीलाई बताउने बताए ।
सङ्ग्रहालयको अवलोकनपछि उत्साहित हुँदै उनले नेपाल भ्रमण बिना भ्रमण पूरा नहुने प्रष्ट पारे । नेपाल भ्रमण वर्ष २०२० को सफलताको कामना गर्दै उनले आफ्ना नगरबासीलाई नेपाल भ्रमण गर्नुपर्ने कारणबारे जानकारी गराउने बताए ।
यस्तै भुटानको थिम्पु नगरका प्रमुख किन्ले दोर्जीले पनि भक्तपुरको संस्कृतिबाट आफू प्रभावित भएको बताए । उनले सम्पदा संरक्षण र विकासमा नगरले देखाएको तदारुकता र प्राप्त गरेको प्रगतीप्रती खुलेर प्रसंशा गरेका थिए ।
काठमाडौँ महानगरपालिकाका प्रमुख विद्यासुन्दर शाक्य, उपप्रमुख हरिप्रभा खड्गीसहितको काठमाडौँ महानगरको टोली विदेशी पाहुनाहरु लिएर भक्तपुरको सांस्कृतिक सम्पदाको भ्रमण गर्न आइपुगेका थिए । उनीहरुलाई भक्तपुर नगरपालिकाका प्रमुख सुनिल प्रजापति, उपप्रमुख सृजना जोशीसहितको टोलीले स्वागत गर्नुको साथै सम्पदा अवलोकन गराएको थियो ।
