भक्तपुर, १ असोज गृहमन्त्रालय अन्तर्गत रहेको राष्ट्रिय परिचयपत्र तथा पञ्जीकरण विभागले करारमा कर्मचारी भर्ना गर्ने विज्ञापनमा ब्यापक आवेदन परेको छ ।
विभागद्वारा सामाजिक सुरक्षा तथा व्यक्तिगत घटना दर्ता प्रणाली सुदृढीकरण आयोजना अन्तर्गत माग गरिएको १९ सय ८९ जनाका लागि करिब ५० हजारको दरखास्त पेश भएको छ ।
कम्प्युटरमा व्यक्तिगत घटना दर्ता गर्ने एम आइ एस अपरेटर (सुब्बा सरह) ९ सय ९४ जना र फिल्ड सहायक (खरिदार सरह )
९ सय ९५ जना गरी १९ सय ८९ जना पदपूर्तीका लागि दरखास्त आव्हान गरिएको थियो । यी पदमा क्रमस १८ हजार ६१ र ३३ हजार २६९ जनाले आवेदन दिएका छन्।
भक्तपुरबाट पनि बेरोजगारले उल्लेख्य मात्रामा आवेदन दिएका छन् । प्रत्येक स्थानीय तहमा एक-एक जना पदपूर्ती गरिने दुवै पदका लागि भक्तपुरको सूर्यविनायकमा सर्वाधिक आवेदन परेको छ ।सूर्यविनायकको लागि एम आइ एस अपरेटरको लागि ८८ र फिल्ड सहायकमा १४३ आवेदन परेको भक्तपुर पोस्टलाई जानकारी प्राप्त भएको छ । त्यसैगरी सवैभन्दा कम भक्तपुर नगरपालिकाको लागि क्रमस ३८ र ६० आवेदन परेको बताइएको छ ।
जिल्लाको चाँगुनारायण नगरपालिकाको लागि एम आइ एस अपरेटर ६८ र फिल्ड सहायकमा १०६ वटा आवेदन परेका छन् भने मध्यपुर थिमीको लागि क्रमस ८४ र १०६ आवेदन परेको राष्ट्रिय परिचयपत्र तथा पञ्जीकरण विभागले जनाएको छ ।