भक्तपुर, २ असोज नेपाल मजदुर किसान पार्टीलाई यतिबेला आफ्नो सातौँ महाविधेशनको चटारो परेको छ । असोज ३ गते शुक्रबारबाट शुरु हुने सातौँ महाविधेशनको तयारीमा पुरै पार्टी पङ्ति जुटेको देखिन्छ ।
नेपाल मजदुर किसान पार्टीका अध्यक्ष नारायणमान बिजुक्छे ‘रोहित’ ले असोज ३ गते दिउसो १ बजे भक्तपुरको सल्लाघारीस्थित खुला चौरमा पार्टीको सातौँ महाधिवेशनको उद्घाटन गर्ने पार्टी सचिव प्रेम सुवालले जानकारी गराएका छन् ।
सचिव सुवालले बिहीवार एक बिज्ञप्ति जारी गर्दै भोली असोज ३ गते शुक्रबार बिहान ११ बजे भक्तपुरको च्याह्मासिंह र बोडे त्यसैगरी काठमाडौको कोटेश्वर समेतगरी तीन ठाउँबाट जुलुश शुरु हुने बताएका छन् । त्यो जुलुस भक्तपुरको सल्लाघारीस्थित खुला चौरमा आएपछि सभामा परिणत हुने र त्यहीँ पार्टी अध्यक्ष बिजुक्छेंले सातौ महाविधेशनको औपचारिक उद्घाटन गर्ने कार्यक्रम तय भएको बताइएको छ ।
सचिव सुवाल द्वारा जारी बिज्ञप्तिमा आम उपस्थितिका लागि समेत आह्वान गरिएको छ । बिज्ञप्तिमा भनिएको छ,”देशमा अहिले एमाले–माओवादीको झण्डै दुईतिहाइको सरकार छ । तर, देशको खुला सीमा सुरक्षित छैन । भारतीय विस्तारवादले बनाएका बाध र तटबन्धको कारण बर्सेनि तराई भूमि डुबानमा परिरहेको छ । अहिले तेह्र खर्बभन्दा बढीको व्यापार घाटा छ र यो बढ्दो छ । भ्रष्टाचार व्याप्त छ, महँगी दिन–दुगुना रात चौगुना बढ्दो छ । सत्तरी लाख नेपाली युवा वैदेशिक रोजगारीको नाममा विदेशी भूमिमा बहुराष्ट्रिय कम्पनीको लागि काम गर्न बाध्य पारिएको छ ।
देशको यो जटिल परिस्थितिमा सम्पन्न हुन गइरहेको नेपाल मजदुर किसान पार्टीको सातौ महाधिवेशनको जुलुश र उदुघाटन समारोहमा महिला, मजदुर, किसान, युवा, विद्यार्थी, शिक्षक, प्राध्यापक, कर्मचारी, बुद्धिजीवी, पत्रकार, उद्योगी, व्यापारीलाई उपस्थितिको लागि नेपाल मजदुर किसान पार्टी पुनः हार्दिक अनुरोध गर्दछ ।”