भक्तपुर, ३ असोज भक्तपुर क्षेत्र नम्बर १ बाट निर्वाचित संघीय सांसद समेत रहेका नेमकिपाका केन्द्रीय सचिव प्रेम सुवालले नेपालको नागरिकता समस्या समाधान गर्न नेपाल–भारत खुला सिमाना बन्द गर्नुपर्ने बताएका छन् । शुक्रवार सल्लाघारीमा पार्टीको सातौँ महाधिवेशनको उद्घाटन सत्रमा बोल्दै सचिव सुवालले सो कुरा बताएका हुन् ।
एक हातले सिन्दुर हाल्ने र अर्को हातले नागरिकता लिने कुरा स्वीकार्य नहुने भन्दै उनले नागरिकता सम्बन्धी कानुन बनाउदा उदार बन्न नहुने अभिव्यक्ति दिए ।
सचिव सुवालले इन्डो प्यासिफिक सैन्य गठबन्धनको नाममा नेपाललाई बलीको बोको बनाउन खोजिएको बताउदै सोही कारण नेमकिपाले इन्डो प्यासिफिक सैन्य गठबन्धनको विरोध गरेको बताए ।
उनले अमेरिकाको दबाबमा सरकारले प्रजग कोरियाली लगानी सबै फिर्ता लान दबाब दिएको चर्चा गर्दै संयुक्त राष्ट्र सङ्घले प्रजग कोरियाविरुद्ध आणविक हतियार बनाएको आरोप लगाएको झूट भएको र संसारमा सबभन्दा बढी हतियार उत्पादन गर्ने देश अमेरिका नै भएको जिकिर गरे ।
“प्रजग कोरियाको साम्राज्यवादविरोधी सङ्घर्षलाई नेपालजस्तो सानो देशले समर्थन गर्नुपर्ने नेमकिपाको मत हो ।” सचिव सुवालले भने ।
उक्त अवसरमा उनले प्रतिनिधिसभामा नेमकिपाले देश र जनताको हितमा गर्दै आएको पहलबारे प्रस्ट पारेका थिए ।
भक्तपुर पोस्टको फेसबुक पेज लाइक गर्न बिर्सनु भएको त छैन ? फेसबुकमै समाचार प्राप्त गर्न पेज लाइक गर्नुहोस् ।