भक्तपुर, १३ असोज भक्तपुरका स्थायी बासिन्दा समेत रहेका प्रधानमन्त्री केपि शर्मा ओलीले भक्तपुरमा शाखा बिस्तार गरेको ‘मानव सेवा आश्रम’ का लागि सरकारले १ करोड रुपियाँ सहयोग दिने उद्घोष गरेका छन् ।
कौशलटारमा आयोजित ‘मानव सेवा आश्रम’को भक्तपुर शाखा उद्घाटन एवं गृह प्रवेश कार्यक्रमका प्रमुख अतिथि रहेका प्रधानमन्त्री ओलीले उक्त उद्घोष गरेका हुन् । त्यतिमात्र होइन, प्रधानमन्त्री ओलीले ‘मानव सेवा आश्रम’ले सहारा दिइरहेका मानिसलाई प्रति व्यक्ति मासिक तीन हजार रुपियाँ दिने घोषणा समेत गरे ।
असहायहरुको सेवामा ‘मानव सेवा आश्रम’ले पुर्याएको सेवा वापत प्रधानमन्त्री ओलीले सस्थाका अभियन्ताहरुलाई सम्मान गर्दै सहयोगको घोषणा गर्दा अभियन्ताहरु दंग देखिए ।
आइतवारको उक्त कार्यक्रमको आयोजना ‘मानव सेवा आश्रम’ले गरेको भएपनि कार्यक्रम गर्न प्रधानमन्त्री स्वयम्ले अनुरोध गरेका एक अभियन्ताले बताए । ‘हामीले प्रधानमन्त्रीज्युलाई बोलाएर सम्मान थापेका होइनौ, उहाँ आफैले सम्मान गर्ने इच्छा गरेपछि कार्यक्रम गरिएको हो ।’ उनले भने ।
आफ्नो कार्यक्रममा उच्च पदस्थ व्यक्ति बोलाएर आफै सम्मान थाप्ने प्रवित्ती हावी भएको बेलामा त्यसको बिपरित मानव सेवा आश्रमका अभियन्ताहरु भने आफूले मानव सेवामा पुर्याएको योगदानको मूल्यांकन हुँदा सम्मानित हुन पुगे ।
प्रधानमन्त्रीको सचिवालयले जनाएअनुसार प्रधानमन्त्री ओलीले आफ्नी पत्नी राधिका शाक्यबाट ‘मानव सेवा आश्रम’का बारेमा थाहाँ पाएपछि अभियन्ताहरुलाई सम्मान गर्ने इच्छा प्रकट गरेका हुन् । उनकै इच्छा बमोजिम भएको कार्यक्रममा आफ्नी पत्नी राधिका शाक्यसहित उपस्थित प्रधानमन्त्री ओलीले ‘मानव सेवा आश्रम’का अभियन्ताहरुलाई सम्मान मात्र गरेनन । उनीहरुको अभियानमा एक करोड अक्षयकोषको स्थापना गर्ने घोषणा समेत गरे । त्यतिमात्र होइन, प्रधानमन्त्री ओलीले ‘मानव सेवा आश्रम’ले सहारा दिइरहेका मानिसलाई मासिक तीन हजार रुपियाँ दिने घोषणा समेत गरे ।
उक्त अवसरमा प्रधानमन्त्री ओली केपी शर्मा ओलीले लिने भन्दा दिने भावना भएकै कारण समाजमा मानवता जीवित भएको भनेका थिए । केहि युवाहरु फेसबुकमा झुन्डिएर फेककुरा गर्दै भ्रम छर्नमै व्यस्त बनेकोप्रति दुख व्यक्त गर्दै उनले युवाहरु सिर्जना र सेवामा लागेमा देश बिकाशमा टेवा पुग्ने बताए ।
कार्यक्रममा कर्मचारीमा जागिरे मानसिकता हट्न नसकेकोले जनताले वास्तविक सेवा प्राप्त गर्न नसकेको बताउदै प्रधानमन्त्री ओलीले कर्मचारीले गर्न नसक्ने काम जनताले गर्न सक्ने र सरकार सधै जनताको साथमा भएको जिकिर गरेका थिए ।
डेंगु रोग बिरुद्ध सरसफाई र जनचेतनामा दिनुपर्ने समय जुलुस र धर्नामा दिएको भन्दै प्रधानमन्त्री ओलीले प्रतिपक्षमाथि पनि व्यंग्य गर्दै भने ” लामखुट्टेले थाहा पाउँछ जुलुस लगाएको भनेर ?’” प्रतिपक्ष रचनात्मक हुन नसक्दा जे को पनि बिरोध भएको र काम गर्न गाह्रो भैरहेको उनको भनाइ थियो ।
उक्त अवसरमा प्रधानमन्त्री ओलीले सबै स्थानीय तहले आफ्नो क्षेत्रमा रहेका असहाय तथा सडक बालबालिकाको व्यवस्थापन गर्नुपर्ने बताउदै त्यसको लागि अपिल समेत गरे ।
सपत्नी पुगेका प्रधानमन्त्री केपी ओली प्रमुख अतिथि रहेको उक्त कार्यक्रममा भक्तपुरका प्रतिनिधि सभाका सांसद महेश बस्नेत, काठमाडौ महानगरका मेयर विद्यासुन्दर शाक्य, सूर्यविनायक र मध्यपुर थिमीका जनप्रतिनिधिहरु लगायत अतिथिको रुपमा उपस्थित रहेका थिए ।
के हो मानव सेवा आश्रम
मानसिक सन्तुलन गुमाएका कारण सडकमा अव्यवस्थित जीवन बिताउन बाध्य मानिसहरु, अपाङ्ग,वृद्ध,रोगी अथवा असहाय भएर सडकमै अलपत्र अवस्थामा बाच्न विवस मानिसहरुको उद्धार गरी उपचार र पालनपोषण गर्न २०६९ सालमा मकवानपुरको हेटौंडामा ‘मानव सेवा आश्रम’ शुरु गरिएको थियो ।
सकारात्मक सोंच भएका उत्साही युवा अभियन्ताहरुले शुरु गरेको यो परोपकारी सस्था करिब ७ वर्षको अवधीमा धेरै प्रगती गर्न सफल भएको छ । यसले चितवन, काठमाडौं, ललितपुर, गोरखा, लम्जुङ, बाग्लुङ, पर्सा, कास्की, रूपन्देही लगायत धेरै ठाउँमा शाखा खोलेर सडक मानव मुक्त समाजको परिकल्पना गर्दै उनीहरुको रेखदेख गरिरहेको छ । ५ जनाको उद्धार गरी शुरु गरिएको यो अभियानमा अहिले सयौ सडक मानवले संरक्षण पाइरहेका छन् । भक्तपुरमा भएको शाखाको आइतवार उद्घाटन भएको हो । यसमा अहिले ११ सडक मानवलाई संरक्षण दिइएको बताइएको छ ।
सस्था भन्ने बित्तिकै हाम्रो मनमा एनजीओ शब्द आउने गर्दछ र बिदेशी दातालाई प्रभावमा पारी डलर झार्ने खेती गर्नेहरुले यो शब्दलाई बद्नाम गराइदिएका छन् । तर तपाइँलाई यो सुनाउदा भक्तपुर पोस्टलाई पनि आनन्द लागेको छ कि यो मानव सेवा आश्रम विशुद्ध परोपकारी अभियान हो, यसले कुनै पनि विदेशी दातृनिकायको रकम लिँदैन । यसका सस्थापक अध्यक्ष रामजी अधिकारी नितान्त देश विदेशमा रहेका नेपालीहरूकै सहयोगले मानव सेवा संचालन गरिरहेको बताउञ्छन ।