भक्तपुर, १६ असोज महानगरीय प्रहरी परिसर भक्तपुरले खेलकुद प्रतियोगिताका बिजेता प्रहरीलाई पुरस्कार वितरण गरेको छ । विहीवार एक विशेष कार्यक्रमका बीच पुरस्कार वितरण गरिएको हो ।
६४ औं प्रहरी दिवसको अवसरमा आयोजित खेलकुद प्रतियोगिताका बिजेताहरुलाई बिहीवार परिसरमा आयोजित एक कार्यक्रममा पुरस्कार वितरण गरिएको थियो ।
महानगरीय प्रहरी कार्यालय रानीपोखरीका प्रमुखसमेत रहेका प्रहरी नायव महानिरीक्षक शैलेश थापा क्षेत्रीको प्रमुख आतिथ्यता रहेको उक्त कार्यक्रममा सहायक प्रमुख जिल्ला अधिकारी दिलिप प्रसाद लामिछाने लगायत अतिथिको रुपमा उपस्थित रहेका थिए ।
कार्यक्रममा प्रमुख अतिथि थापा क्षेत्रीले पुरस्कार बिजेता भक्तपुरका एक दर्जन बढी प्रहरीलाई शिल्ड, मेडल र प्रमाणपत्रद्वारा पुरस्कृत गरेका थिए । उक्त अवसरमा उपस्थित भक्तपुर प्रहरीलाई निर्देशन दिंदै प्रहरी नायव महानिरीक्षक क्षेत्रीले प्रहरी भएपछि नागरीकको शान्ति सुरक्षाको लागि हमेसा लाग्नुपर्नेमा जोड दिए । दशैंको अवसरमा हुनसक्ने चोरी, लूटपाट र दुर्घटना रोक्न प्रहरी चनाखो हुनुपर्ने उनको भनाइ थियो । कार्यक्रममा उनले आवश्यक नीति निर्देशन पनि दिएका थिए ।
कार्यक्रममा महानगरीय प्रहरी परिसर भक्तपुरका प्रमुख प्रहरी उपरीक्षक सबिन प्रधानको नेतृत्वमा परिसरका प्रहरी नायव उपरीक्षक रेवतीरमण पोखरेल, ठिमी वृत्तका प्रमुख प्रहरी नायव उपरीक्षक शान्तिराज कोईराला र जगातीका प्रमुख प्रहरी नायव उपरीक्षक चक्रराज जोशी लगायत सिनियर प्रहरी अधिकृत र सकल दर्जाका प्रहरी कर्मचारीहरुको उपस्थिति रहेको मनानगरीय प्रहरी परिसरले जनाएको छ ।
उक्त अवसरमा नजिकिदै गरेको नेपालीहरुको महान चाड विजयादशमी, शुभ दिपावली, नेपाल सम्वत् र छठ पर्वको शुभकामना समेत आदान प्रदान गरिएको थियो ।
