भक्तपुर प्रहरीले दशैँकाे मौका पारी मासुको लागि गोरु चोरी गरी काट्ने मानिसहरुलाई पक्राउ गरी अनुसन्धान गरिरहेको छ । दशैँको द्वादशीका दिन गोरु काटी भाग लगाउदै गरेको अवस्थामा ४ जना पक्राउ परेका हुन् ।
मध्यपुर थिमी नगरपालिका- १ मनोहरामा गोठमा बाँधेको बहर गोरू चोरी मनोहरा खोला छेउमा उक्त गोरू काटी भाग लगाउदै गरेको अवस्थामा महानगरीय प्रहरी वृत्त ठिमीको प्रहरी टोलीले उनीहरुलाई तत्कालै पक्राउ गरेको थियो । पक्राउ पर्नेमा पाँचथर जिल्ला स्थायी घर भै मनोहरामा बस्दै आएका जगत कुमार थापा मगर, नरेश लिम्बु, बसन्त लिम्बु र सागर भन्ने सन्त कुमार बेघा रहेको महानगरीय प्रहरी परिसर भक्तपुरका सूचना अधिकारी रहेका डीएसपी रेवती रमण पोखरेलले पुष्टी गरेका छन् ।
उनीहरुलाई मासु काट्न प्रयोग भएका औजारहरु सहित असोज २३ गते नै नियन्त्रणमा लिइएको र मंगलवार जिल्ला अदालत भक्तपुरले पशुपंक्षी सम्बन्धि कसुरमा २३ गतेबाटै लागु हुने गरी म्याद थप गरिदिएको पोखरेलले बताए । पक्राउ परेका चारै जना उपर आवश्यक अनुसन्धान कार्य भईरहेको उनको भनाइ छ ।
