भक्तपुर, २ कात्तिक भक्तपुर नगरपालिकाका प्रमुख सुनिल प्रजापतिले भक्तपुर नगरपालिका मेडिकल कलेजसहितको विश्वविद्यालय सञ्चालन गर्ने पहिलो नगर सरकार बन्ने बताएका छन् । सरकारले पक्षपात नगरी ख्वप विश्वविद्यालय स्वीकृति दिएको खण्डमा भक्तपुर नगरपालिका मेडिकल कलेजसहितको विश्वविद्यालय सञ्चालन गर्ने पहिलो नगर सरकार बन्ने नगर प्रमुख प्रजापतिले बताएका हुन् ।
भक्तपुर-३ बोलाछेँ स्थित सामूहिक बचत तथा ऋण सहकारी संस्थाको २२ औं स्थापना दिवसको अवसरमा आयोजित सभालाई शनिवार सम्बोधन गर्दै नेमकिपाका केन्द्रीय सदस्य समेत रहेका नगर प्रमुख प्रजापतिले भक्तपुर नगरपालिका मेडिकल कलेजसहितको विश्वविद्यालय सञ्चालन गर्ने तयारी अवस्थामा रहेपनि विश्वविद्यालय सञ्चालनको स्वीकृती पाउन नसकेको बताए । भक्तपुर नगरपालिकाले विश्वविद्यालय स्वीकृती पाएमा ज्यादै न्यून शुल्कमा डाक्टर उत्पादन गर्न सकिने र यसले स्वास्थ्य सेवामा सकारात्मक प्रभाव पार्ने उनको जिकिर छ ।
नगरपालिकाद्वारा सञ्चालित विभिन्न कलेजहरुले भक्तपुरका परिवारै पिच्छे इन्जिनियर, नर्स, बैंकर लगायतका देशको लागि आवश्यक दक्ष जनशक्ति तयार गरिरहेको दावी गर्दै प्रमुख प्रजापतिले शिक्षालाई नगरपालिकाले महत्वका साथ् अघि बढाएको बताए । शिक्षाको विकाशबाट अन्य क्षेत्र आफै लाभान्वित हुने भन्दै उनले उच्च शिक्षामा मात्र नभई प्रत्येक वडामा सुविधासम्पन्न शिशुस्याहार केन्द्रहरु सञ्चालनमा समेत नगरपालिका जुटिरहेको जानकारी गराए ।
सामूहिक बचत तथा ऋण सहकारी संस्थाको २२ औं वार्षिकोत्सवको अवसरमा शनिबार ३१ जना ज्येष्ठ नागरिक तथा एसईई उत्तीर्ण विद्यार्थीहरुलाई सम्मान गरिएको थियो । कार्यक्रममा भक्तपुर-३ का वडाध्यक्ष राजकृष्ण गोरा,भक्तपुर जिल्ला बचत तथा ऋण सहकारी संस्थाका अध्यक्ष कृष्णगोविन्द लाखाजु, सस्थाका अध्यक्ष धनेशराज राजोपाध्याय, संस्थापक अध्यक्ष श्यामप्रसाद मुनंकर्मी, उपाध्यक्ष राजाभाई भेले र सचिव विष्णुगोपाल खिम्बाग लगायतले आ–आफ्नो धारणा व्यक्त गरेका थिए ।