भक्तपुर, ९ कात्तिकभक्तपुरमा तिहार संगै सडकमै जुवा खाल जमेको छ । मानिसहरुले कौडाको सट्टा लुडोको गोटीलाई नै जुवा खेल्न प्रयोग गरिरहेका छन् ।
भक्तपुर-१ स्थित दुधपाटीमा तिहार अघि पनि विशेषगरी यातायात मजदुरहरु यस्तो जुवा खेल्न झुम्मिएका देखिन्छन् । शहर पस्ने द्वारको दायाँबायाँ नै मानिसहरु जुवा खेल्न व्यस्त भएको दृश्य देखिएपनि स्थानीय प्रहरीले हस्तक्षेप गरेको छैन ।
बरको बोट मुनी र मिनी बसपार्क छेउको पेटीमा मानिसहरु झुम्मिएर जुवा खेलिरहेको दृश्य २ मिनेटको दुरीमा रहेको दुधपाटीस्थित महानगरीय प्रहरी प्रभागको आखाँमा पर्न नसक्दा दिनहुँ हजारौ रुपियाँको हारजित भैरहेको एक स्थानीयले बताए ।
कतिपयले लुडो खेललाई नै बाजीमा जुवा जसरी खेल्ने गरेका छन् भने कतिले लुडोको गोटीलाई नै कौडा जस्तै प्रयोग गरी जुवा खेलिरहेका छन् । यसरी हेर्दा लुडो जस्तो देखिने खेलमा दर्शकलाई आफ्नो गोटीमा च्याखे थाप्ने सुबिधा समेत प्राप्त रहेको छ ।
तिहार लागेसंगै बाजीको दर समेत बढ्दै गएको बताइएको छ । यसरी सडक पेटीमै जुवा खेलिदा समेत प्रहरी मौन रहेको भन्दै खेल देख्नेहरुले प्रहरीको आलोचना गर्दै हिड्ने गरेका छन् ।
”जुवातास बिरुद्ध ससक्त कारवाही चलाइरहेको भक्तपुर प्रहरीले सडक पेटीमै बसेर जुवा खेल्दा नदेख्नु बिडम्बना हो ।” एक शिक्षकले गुनासो गरे ।