भक्तपुर, २८ कात्तिक तत्कालिन वाईसीयल र युवा संघको एकताबाट बनेको राष्ट्रिय युवा संघ नेपालले आफ्ना जिल्ला संयोजक र सह-संयोजकको टुंगो लगाएको छ ।.
भक्तपुरमा उक्त संगठनका नेता राजु लुवन्जार श्रेष्ठ संयोजक चयन भएका छन् भने अजय श्रेष्ठलाई सहसंयोजक बनाइएको छ । राजु तत्कालिन युवा संघका हुन् भने अजय वाईसीयल पृष्ठभूमीका हुन् ।
राष्ट्रिय युवा संघ नेपालको इन्चार्जको रुपमा नेकपाले आफ्ना केन्द्रीय सदस्य एवं भक्तपुर २ बाट निर्वाचित सांसद महेश बस्नेतलाई जिम्मेवारी दिएको छ भने सह-इन्चार्ज को रुपमा भक्तपुरमै बस्ने रामप्रसाद सापकोटा दीपशिखाले जिम्मेवारी पाएका छन् । इन्चार्ज र सह इन्चार्ज नै भक्तपुरका भएकाले यहाँका संयोजक र सहसंयोजकको विशेष भूमिका हुने उक्त संगठनका एक नेताले बताए ।
युवा संघको केन्द्रीय पदाधिकारी वैठकले ७७ जिल्लामध्ये साविक युवा संघलाई ४२ जिल्ला र साविक योङ कम्युनिष्ट लिग (वाईसीएल)लाई ३५ जिल्लाको नेतृत्व पाउने गरि सहमति गरिए बमोजिम जिल्ला नेतृत्व टुंगो लागेको उक्त संगठनका केन्द्रीय सदस्य दिनेश थपलियाले जानकारी दिए । संघले सबै जिल्लाको नेतृत्व टुङ्गाएको जनाइएको छ ।