भक्तपुर, १ मङ्सिर उपनिर्वाचनमा भक्तपुर क्षेत्र नम्वर १ अन्तर्गत प्रदेश क्षेत्र नम्बर १ बाट प्रदेश सभा सदस्यका लागि नेपाली काँग्रेसका तर्फबाट उम्मेदवार रहेका कृष्णलाल भँडेललाई मातृ शोक परेको छ । उनकी ममतामयी माता सेतीमाया भँडेलको उपचारको क्रममा आइतवार विहान निधन भएको हो । उनी उक्त रक्तचापको बिरामी थिइन् ।
उम्मेदवार भँडेलकी ८४ वर्षिया आमा सेतीमाया भँडेलको उपचारको क्रममा ठिमीस्थित मध्यपुर अस्पतालमा आइतवार विहान निधन भएपछि बिहानै उनको अन्तिम सस्कार समेत सम्पन्न भएको पारिवारिक श्रोतले जनाएको छ । भँडेल सेतीमायाका एक्ला छोरा हुन् ।
स्वर्गीय सेतीमायालाई श्रद्धान्जली दिन नेपाली काँग्रेसका पार्टी सभापति शेर बहादुर देउवा, नेता प्रकाश शरण महत, गगन थापा लगायत ठूलो संख्यामा जिल्लाका नेता कार्यकर्ता, आफन्त र शुभचिन्तक पशुपतिस्थित आर्यघाट पुगेका थिए । सभापति देउवाले पार्टीका तर्फबाट स्वर्गीय सेतीमाया प्रति हार्दी श्रद्धान्जली र नेता कृष्णलाल लगायत शोकाकूल सबैमा समवेदना प्रकट गरेका छन् ।
उम्मेदवारकै आमाको निधन भएपछी काँग्रेसको चुनावी अभियानमा समेत असर परेको छ । भक्तपुरमा चुनावी कार्यक्रम हाललाई स्थगित गरिएको छ । भक्तपुर जिल्ला सभापति दुर्लभ थापाले शोकलाई शक्तिमा बदल्नुको बिकल्प नभएको भन्दै चुनावी अभियानलाई छिट्टै निरन्तरता दिइने बताएका छन ।