सत्तारुढ दल नेपाल कम्युनिष्ट पार्टी (नेकपा) को युवा संगठन राष्ट्रिय युवा संघ नेपालले भक्तपुरको उपनिर्वाचनमा पार्टीको लागि प्रचार सामाग्री सहयोग गरेको छ । स्वयंसेवक पठाएर सहयोग गरिरहेको युवा संघले प्रचार सामाग्री समेत सहयोग गरेको हो ।

बिहीबार राष्ट्रिय युवा संघ नेपालका सह संयोजक रमेश पौडेलको नेतृत्वमा आएको टोलीले निर्वाचन परिचालन कमिटीका संयोजक समेत रहेका भक्तपुर जिल्ला पार्टीका अध्यक्ष बचन देउजालाई प्रचार सामाग्री हस्तान्तरण गरेको थियो । भक्तपुरको कमलविनायकस्थित चुनाव प्रचार प्रसारको लागि खोलिएको कार्यालयमा पुगी पौडेलको नेतृत्वमा रहेका युवा संघका नेताहरुले प्रचार सामाग्री हस्तान्तरण गरेका थिए ।

भक्तपुरको निर्वाचन क्षेत्र नम्बर १ अन्तर्गत प्रदेश क्षेत्र नम्बर १ का लागि हुनगैरहेको प्रदेश सभा सदस्य उम्मेदवार डीपी ढकालको लागि प्रचार सामाग्री बनाएर उपलब्ध गराएको राष्ट्रिय युवा संघ नेपालका केन्द्रीय सदस्य समेत रहेका नेकपा भक्तपुरका जिल्ला कमिटी सदस्य दिनेश थपलियाले जानकारी दिए । थपलियाका अनुसार युवा संघले २ हजार भित्ते पोस्टर र ४ हजार स्टिकर उपलब्ध गराएको छ ।