भक्तपुर, १४ मङ्सिर नेपाल कम्युनिष्ट पार्टी(नेकपा)का उम्मेदवार डीपी ढकालले मतदान गरेका छन् । प्रदेश सभा सदस्य पदका सूर्य ध्वजाबाहक उम्मेदवार ढकालले बिहानै मतदान स्थल पुगी आफूले आफैलाई मतदान गरेका हुन् ।
बिहान ७ बजेबाट शुरु भएको मतदानमा उम्मेदवार ढकाल बिहानै पुगेका थिए । सर्वसाधारण सरह लाइनमा बसेर उनले करिब ८:३० बजेको समयमा मतदान गरेका यज्ञराज ढुंगानाले बताए ।
भक्तपुर नगरपालिका वडा नम्बर १० कमलविनायकका स्थायी बासिन्दा ढकालले कमलबिनायकस्थित सरस्वति विद्या गृह मतदान केन्द्रबाट मतदान गरेका हुन् । काभ्रेको देउपुर जन्मथलो भै भक्तपुरमा स्थायीरुपले बस्दै आएपनि उनलाई पर्यटक उम्मेद्वार भन्दै विपक्षीले प्रचार गरेका थिए ।
भक्तपुर निर्वाचन क्षेत्र नम्बर १ अन्तर्गत प्रदेश निर्वाचन क्षेत्र नम्बर १ मा जारी उपनिर्वाचनमा भक्तपुर-१० का साथै चाँगुनारायण नगरपालिकाका सबै वडाका मतदाता मतदानमा व्यस्त देखिएका छन् । मतदानमा मतदाताको उत्साहप्रद सहभागिता देखिएको निर्वाचन आयोगको कार्यालयले जनाएको छ । भक्तपुर निर्वाचन क्षेत्र नम्बर १ ( १ ) मा करिब ४५ हजार मतदाता रहेका छन् ।
सच्याइएको : कमलविनायकस्थित सरस्वती विद्या गृह मतदान केन्द्रबाट मतदान गर्ने भनेर भुलवस नेमकिपाका अध्यक्ष नारायणमान बिजुक्छे र उक्त पार्टीको उम्मेदवार निरज लबजूको नाम पर्न गएकोले सच्याइएको छ । भक्तपुर-१० कमलविनायक निवासी नेमकिपाका अध्यक्ष बिजुक्छेको मतदाता नामावलीमा वडा नम्बर ४ र लबजूको ९ मा नाम भएकोले उनीहरुले यस मतदानमा भाग लिएका छैनन् ।- सम्पादक