भक्तपुर, १७ मङ्सिरभक्तपुर नगरपालिकाकी उपप्रमुख रजनी जोशीले समाजमा महिला हिँसामा महिलाकै हात बढी भएको भन्दै त्यसको अन्त्य हुनुपर्ने आवश्यकता औल्याइन ।
मंगलवार भक्तपुर नगरपालिका वडा नं ६ द्वारा आयोजित लैङ्गिक हिंसा विरुद्धको कानुनी साक्षरता कार्यक्रममा बोल्दै कार्यक्रमको प्रमुख अतिथि समेत रहेकी उप प्रमुख जोशीले कतिपय पिडित महिलाहरु हिंसामा परे पनि लुकाउने गरेका कारण पीडकको आत्मबल बढेको बताइन । पिडालाई सहेर नभई लडेर मुकाबिला गर्नुपर्नेमा जोशीको जोड रहेको छ ।
समाजमा महिला र पुरुषबीच भेदभाव कायम रहेका कारण अहिले पनि स्त्री भ्रुण हत्याको कहालीलाग्दो अवस्था रहेको उनको भनाइ छ । २१ औं शताब्दीमा प्रविधिको विकासले गर्भपतनको समस्या विकृतिको रुपमा देखापरेको उनले दावी गरिन । उनले यसलाई नियन्त्रण गर्न समाज अगाडी बढ्नुपर्ने बताइन ।
कार्यक्रममा वडा नं ६ वडा अध्यक्ष हरिराम सुवाल,वडा सदस्य गोविन्द दुवाल, वडा सदस्य रोशनमैया सुवाल,कानुन अध्ययन समाजका सदस्य तथा अधिवक्ता अनिता जधारी लगायतले घरेलु हिंसा भएको थाहाँ पाउने र त्यसका बिरुद्ध लड्ने बारे सुसूचित गराएका थिए ।