भक्तपुर, २९ मङ्सिर दोलखाको कालिञ्चोक भगवतीको दर्शन गरी भक्तपुर आउदै गरेको यात्रुबाहक बस ६ किलो भन्ने ठाउँमा दुर्घटना हुँदा बसमा सवार १४ यात्रुको मृत्यु भएको छ भने १८ घाइते भएका छन् ।
भक्तपुरका प्रमुख जिल्ला अधिकारी हुमकला पाण्डेका अनुसार बा ४ ख ४४६८ नम्बरको यात्रुबाहक बस सूर्यविनायकबाट रिजर्भमा यात्रु बोकेर कालिञ्चोक गएको थियो । आइतवार सूर्यविनायक फर्कने क्रममा बिहान अन्दाजी ८ः१५ बजे ६ किलो भन्ने ठाउँमा बस दुर्घटनामा परेको हो ।
ख्वप प्रालिको उक्त बसका चालक फरार रहेका र सहचालक घाइते भएकाले बसमा सवार यात्रुको विवरण प्राप्त गर्न नसकिएको भक्तपुर सीडीओ पाण्डेको भनाइ छ । बस धनीको खोजी भैरहेको उनले बताइन ।
प्रजिअ पाण्डेका अनुसार १२ यात्रुको घटनास्थलमै र २ को उपचारका लागि लैजादालैजादै बाटोमै मृत्यु भएको छ । मृतकको पहिचान हुन नसकेकाले बसमा सवार यात्रुका आफन्तको समेत खोजी भैरहेको प्रजिअ पाण्डेले जानकारी गराइन ।
प्रजिअ पाण्डेले बताए अनुसार १८ यात्रु घाइते भएकोमा ८ को अवस्था गम्भीर छ । उनीहरुलाई हिम्स अस्पतालमा भर्ना गरी सघन उपचार भैरहेको छ भने १० जनाको सिन्धुपाल्चोकस्थित स्थानीय सिन्धु अस्पतालमै उपचार भैरहेको छ ।
भक्तपुरको प्रहरी प्रशासनले दुर्घटना पछिको उद्धार र उपचारमा समन्वय गरिरहेको प्रजिअ पाण्डेले भक्तपुर पोस्ट संग बताएकी छन् ।
भक्तपुर पोस्टको फेसबुक पेज लाइक गरी फेसबुकमै समाचार प्राप्त गर्नुस्