भक्तपुरको चाँगुनारायण नगरपालिकाले प्रत्येक महिलालाई नि:शुल्क सीपमूलक तालिम संचालन गर्ने भएको छ । यस आर्थिक वर्षका लागि स्वीकृत कार्यक्रम अन्तर्गत नगरपालिकाले महिलाहरुका लागि सीपमूलक तालिम संचालन गर्ने भएको हो ।

चाँगुनारायण नगरपालिका प्रमुख सोमप्रसाद मिश्रका अनुसार नगरपालिका भित्रका प्रत्येक महिलालाई क्रमस: सीपमूलक तालिम उपलब्ध गराइने कार्यक्रम अन्तर्गत नगरपालिकाले सीपमूलक तालिममा सहभागी बन्न इच्छुक महिलाबाट आवेदन माग समेत गरिसकेको छ । एक महिलालाई एक सीपमूलक तालिम मात्र उपलब्ध गराइने भक्तपुर पोस्ट संग उनले भने ।

नेकपाका केन्द्रीय सदस्य समेत रहेका नगर प्रमुख मिश्रले महिलाहरुले चाहेको सीपमूलक तालिमका लागि नगरपालिकामा आवेदन दिन सूचना गरिएको जानकारी गराए । सुखी नेपाली र समृद्ध नेपालको योजना सफल पार्न प्रत्येक घरमा आम्दानी बढ्नुपर्ने बताउदै नगर प्रमुख मिश्रले  सीपमूलक तालिमले यसमा सहयोग पुर्याउने विस्वास व्यक्त गरे ।

नगरपालिकाकी अधिकृत निला कुमारी घिमिरेका अनुसार तालिममा सहभागी हुन चाहने महिलाहरुले पुस २२ गते सम्म आवेदन दिन सक्नेछन । खरीपाटीस्थित नगर कार्यपालिकाको कार्यालयमा आवेदन बुझाउनुपर्ने घिमिरेले बताइन । उनका अनुसार नागरिकताको प्रतिलिपि आवेदनका साथ् पेश गर्नुपर्नेछ । यस अघि कुनै तालिम लिएका महिलाहरुले त्यसको प्रमाण पत्रको प्रतिलिपि र पढेलेखेका महिलाहरुले आफ्नो शैक्षिक योग्यताको प्रमाणपत्रको प्रतिलिपि समेत संलग्न गरी आवेदन दिन सक्ने अधिकृत घिमिरेले भक्तपुर पोस्ट संग भनिन् ।

भक्तपुर पोस्टको फेसबुक पेज लाइक गर्नुभयो ?